काठमाडौं । वासु शशी स्मृति परिषद्ले कवि तथा नाटककार वासु शशीको ८८औँ जन्मजयन्तीको अवसर पारेर तीन स्रष्टाहरूलाई सम्मानित गरेको छ ।

मंगलबार पर्यटन बोर्डमा आयोजित कार्यक्रममा प्रमुख अतिथि दिव्य शताब्दी पुरुष डा. गौरीशंकर लाल दासले स्रष्टाहरूलाई सम्मानित गरे । कार्यक्रममा ‘वासु शशी साहित्य सम्मान–२०८०’ लोकप्रिय गीतकार तथा कवि किरण खरेललाई समर्पण गरियो ।

त्यस्तै, ‘वासु शशी साहित्य पुरस्कार–२०८०’ साहित्यकार प्रतिसरा सायमिलाई प्रदान गरियो । पुरस्कारका साथ नगद राशि २५ हजारसमेत प्रदान गरियो ।

सोही अवसरमा कवि कृष्ण जोशीको स्मृतिमा स्थापित ‘कृष्ण–सरस्वती साहित्य पुरस्कार–२०८०’ साहित्यकार प्रा.डा. विष्णु राईलाई प्रदान गरियो । पुरस्कारका साथ नगद राशि २५ हजारसमेत प्रदान गरियो ।

सम्मानित तथा पुरस्कृत साहित्यकारहरूलाई सम्मानित गर्दै डा. गौरीशंकर लाल दासले कवि वासु शशीसँग आफ्नो सम्बन्ध र बिताएका क्षणहरूको स्मरण गरे ।

कार्यक्रममा प्रकाश सायमीले सम्मानित स्रष्टा किरण खरेलको परिचयसहित उनको गीति यात्राबारे प्रकाश पारे । 

साहित्यकारहरूको बाक्लो उपस्थिति रहेको कार्यक्रममा गणेश रसिक, प्रद्युम्न जोशी, प्रतिसरा सायमि, विष्णु राईलगायतले बोलेका थिए ।