काठमाडौं । वागमती प्रदेश सरकारले अनलाइनमार्फत पटके बाटो इजाजतपत्रको भुक्तानी गर्न सकिने प्रणाली ल्याएको छ । वाग्मती प्रदेश सरकारका श्रम, रोजगार तथा यातायातमन्त्री लक्ष्मण लम्सालले भुक्तानी प्रणाली सार्वजनिक गरेका हुन् ।

यसका निम्ति भक्तपुरको सल्लाघारीस्थित यातायात व्यवस्था सेवा कार्यालयमा मंगलबार एक कार्यक्रमको आयोजना गरियो । उनले सेवाग्राहीलाई सुविधा दिन र राजस्व संकलनमा समेत तलमाथि नहोस् भन्ने उद्देश्यका साथ सेवा सुरु गरिएको बताए ।

उनले भने, “यो अनलाइन सिस्टम गर्नेबित्तिकै हामीले कार्यालय जानै परेन । कार्यालय नगईकन अस्थायी पटके अनलाइनबाट लिने गरी यो व्यवस्थालाई सुरु गर्नका लागि हामीले विगत तीन÷चार महिनादेखि धेरै छलफल गर्‍यौँ ।”

कार्यक्रममा भक्तपुरका प्रमुख जिल्ला अधिकारी रोशनीकुमारी श्रेष्ठले यो अनलाइन सेवा सुशासनका क्षेत्रमा महत्त्वपूर्ण कदम हुने विश्वास व्यक्त गरिन् । न्युज एजेन्सी नेपाल