काठमाडौं । १५ दिने ऐतिहासिक मिथिला माध्यमिकी परिक्रमा सम्पन्न भएको छ । फागुन प्रतिपदामा सुरु परिक्रमा सोमबार जनकपुरधामको अन्तरगृह परिक्रमासँगै सकिएको हो ।

परिक्रमा टोली आइतबार जनकपुरधाम आइपुगेको थियो । राति जनकपुरधाममै विश्राम गरी टोलीले आज अन्तरगृह परिक्रमा गरेको हो । साधुसन्त, महन्त र श्रद्धालुले राम–जानकीको डोला लिएर जनकपुरधामको अन्तरगृह परिक्रमा गरेका थिए ।

अन्तरगृह परिक्रमाको दूरी पाँच कोष छ । त्यसैले यसलाई ‘पञ्चकोसी परिक्रमा’ पनि भन्ने गरिन्छ ।

मिथिलाको महाकुम्भ मानिने १५ दिने यो परिक्रमामा जनकपुरधामको हनुमाननगर, भारत, बिहारको कलनास्थित कल्यानेश्वर, भारतकै फुलहरस्थित गिरिजास्थान, महोत्तरीको मठिहानी, जलेश्वर, मडैई, धुव्रकुण्ड, कञ्चनवन, धनुषाको पर्वता, धनुषाधाम, सतोखर, औरही, बिहारको करुणा विसौल र जनकपुरधामसहित १३३ किलोमिटर भूभागको पदयात्रा गरिन्छ । न्युज एजेन्सी नेपाल