काठमाडौं । नेकपा (एमाले)का अध्यक्ष केपी शर्मा ओलीले पार्टीबाट इलाम–२ का लागि उमेदवार बनेका सुहाङ नेम्वाङसँग 'केही गर्ने हुटहुटी र ऊर्जा' रहेको बताएका छन् ।
एमालेले आजमात्र नेम्वाङलाई उमेदवार बनाउने निर्णय गरेको छ । पार्टीको निर्णयपछि ओलीले सामाजिक सञ्जालबाट आफूले नेम्वाङलाई 'सरल र नयाँ जोस भएका युवाको रूपमा पाएको' बताएका छन् ।
"३२ वर्षीय सुहाङ नेम्वाङ इलाम–२ को उपनिर्वाचनमा उमेदवार बनेका छन् । फुटबल र क्रिकेटमा रुचि भएका, पेसाले लयर सुहाङलाई भेट्दा सरल र नयाँ जोस भएका युवाको रूपमा पाएको छु । आम युवामा जस्तै उनमा पनि केही गर्ने हुटहुटी र ऊर्जा छ । शुभकामना छ सुहाङ !," ओलीले भनेका छन् ।
सुहाङ संविधानसभाका अध्यक्ष तथा एमालेका तत्कालीन उपाध्यक्ष सुवास नेम्वाङका कान्छा छोरा हुन् । सुवास नेम्वाङको गत भदौ २६ गते निधन भएको थियो ।
उनको निधनपछि रिक्त पदमा वैशाख १५ गते उपनिर्वाचन हुँदै छ ।
