काठमाडौं । महिला न्यायाधीशहरूको प्रथम राष्ट्रिय सम्मेलन भोलि (शुक्रबार)देखि हुने भएको छ । ‘न्यायिक प्रणालीमा लैंगिक समानताको अभिवृद्धि हाम्रो प्रतिबद्धता’का साथ ललितपुरको होटेल हिमालयनमा बिहान ९ बजेबाट सम्मेलन सुरु हुनेछ ।  

सम्मेलन दुई दिनसम्म चल्नेछ । सम्मेलनमा सर्वोच्च अदालत, उच्च अदालतल र जिल्ला अदालतमा कार्यरत ४३ न्यायाधीशसहित पूर्वमहिला न्यायाधीशहरू र सर्वोच्च अदालतका न्यायाधीशहरूकोे सहभागिता रहने सर्वोच्च अदालतकी न्यायाधीश सपना प्रधान मल्लले जानकारी दिइन् ।

राष्ट्रिय न्यायिक प्रतिष्ठानको आयोजनामा हुने सम्मेलनमा न्यायिक समुदायभित्र सहकार्य, सशक्तिकरण र समान सहभागिताका वकालतको हल हुने बताइएको छ । न्यायाधीश समाजको अध्यक्ष समेत रहेकी न्यायाधीश प्रधानले महिला न्यायाधीशहरूका अनुभव गरेका चुनौतीहरूको पहिचान, चुनौती व्यवस्थापनका सवाल र व्यावसायिक क्षमता विकासका लागि सम्मेलन विचारको आदानप्रदान गर्ने मञ्च बन्ने विश्वास व्यक्त गरिन् । 

पत्रकार सम्मेलनमा महिला न्यायाधीश समाजको अध्यक्ष समेत रहेकी सर्वोच्च अदालतकी न्यायाधीश शारंगा सुवेदीले अनुभव आदानप्रदान, लैंगिक न्यायको विषय र व्यावसायिक क्षमता अभिवृद्धिका लागि पनि सम्मेलन उपयोगी हुने विश्वास व्यक्त गरिन् ।

हाल सर्वोच्च अदालतमा तीन, उच्च अदालतमा एक मुख्य न्यायाधीशसहित २२ र जिल्ला अदालतमा १८ महिला न्यायाधीश छन् । कुल न्यायाधीश संख्याको १०.५३ प्रतिशतको संख्यामा रहेका महिला न्यायाधीशहरूले आगामी दिनमा संख्या र प्रतिशतमा निरन्तर वृद्धि हुँदै जाने विश्वास व्यक्त गरेका छन् । 

सम्मेलनमा प्रथम महिला न्यायाधीशदेखि प्रथम महिला प्रधानन्यायाधीश सुशिला कार्कीको सहभागिता रहने छ । सम्मेलनको अन्त्यमा ललितपुर घोषणापत्र जारी हुने बताइएको छ ।