काठमाडौं । लोकतान्त्रिक समाजवादी पार्टी (लोसपा)का अध्यक्ष महन्थ ठाकुर नेपालमा लोकतन्त्र आए पनि चालचलन ‘गोर्खाली सम्राज्यवाद’को भएको बताएका छन् । शनिबार सिरहामा सहिद केशव कोइरालाको सालिक अनावरण कार्यक्रममा उनले यस्तो बताएका हुन् ।

“...अहिले यस्तो लाग्छ, यो नेपाल लोकतन्त्र त छ, गणतन्त्र पनि छ, तर अहिले पनि यहाँको चालचलन गोर्खाली सम्राज्यवादको जस्तै छ,” उनले भने ।

उनले राष्ट्रपति रामचन्द्र पौडेल सहभागी कार्यक्रममा आफ्ना सांसदहरूको उपेक्षा भएको बताए । ‘अपमान’ गर्ने जानकारी भएको भए आफू कार्यक्रममै नआउने भन्दै उनले असन्तुष्टि व्यक्त गरे ।

“केही भन्नुपूर्व म निवेदन गर्न चाहन्छु, महोत्तरीको जिल्लाको हाम्रै क्षेत्रको सांसदहरू पनि हामीसँगै आएका थिए । अहिले मैले यहाँ देखिनँ । सम्माननीय राष्ट्रपतिजी, यो तपाईंको कार्यक्रम होइन, यो त यहाँका मेयरको कार्यक्रम हो,” उनले भने, “उहाँकै निमन्त्रणमा म आएको हुँ । अहिले पनि मलाई थाहा थिएन कि यस तरिकाको अपमान हाम्रा सांसदहरूको हुन्छ । जो तपाईंसँगै तपाईंको स्वागतका लागि आएका थिए । उनीहरूलाई औपचारिकताको रूपमा नाम समेत बोइएन । यो के हो ?”

लोकतन्त्रमा जनतामा अधिकार हुने उनले उल्लेख गरे । सबैभन्दा माथि पनि जनता नै रहने उनले बताए । “हामी लोकतन्त्रको लागि संघर्ष गरेका हौँ । तर, लोकतन्त्रमा जनतामा अधिकार हुन्छ । सबैभन्दा माथि जनता हुन्छन्,” उनले भने, “मैले यहाँ मेयरसँग बुझ्दा माथिबाटै आएको आदेश भन्नुभयो । सबैभन्दा माथि त हाम्रैसामु हुनुहुन्छ, उहाँभन्दा माथि त संविधानमा नेपालमा कोही छैन ।”

उनले कुनै पनि बेला विद्रोह हुन सक्ने चेतावनी दिए । न्युज एजेन्सी नेपाल