काठमाडौं । नेकपा (एमाले)का सांसद ठाकुर गैरेले संसदीय अभ्यासमा अमिल्दो प्रयोग गर्न खोज्जे प्रवृत्ति त्याग्नुपर्नेमा जोड दिएका छन् । बिहीबार प्रतिनिधिसभा बैठकको विशेष समयमा उनले ‘सत्तामा रहँदा कानमा तेल हालेर बस्ने, प्रतिपक्षमा हुँदा क्रान्तिकारी बन्ने प्रवृत्ति त्याग्नुपर्ने’ बताएका हुन् ।
“संसदीय अभ्यासमा अमिल्दो प्रयोग हामीले गर्दै आइरहेका छौँ । सरकारमा बसेको बेला, सत्तापक्षको बेन्चमा बसेको बेला देशमा जतिसुकै समस्या परून्, विकास नहोस्, भ्रष्टाचार होस्, बेथिति बढून्, कानमा तेल हालेर बस्ने । त्यसमा कुनै चासो नराख्ने,” उनले भने, “तर, प्रतिपक्षमा पुग्नासाथ भयंकार क्रान्तिकारी बन्ने प्रवृत्ति त्याग्नुपर्दछ ।”
उनले देशमा भएका समस्या साझा भएको बताए । ती समस्या समाधान गर्ने सबै सांसद, दलहरूको साझा दायित्व भएको र सरकारले त्यसको नेतृत्व गर्नुपर्ने उनको भनाइ छ ।
विगतमा एमाले नेतृत्वको सरकारमा हुँदा र प्रतिपक्षमा हुँदा गरेको प्रश्नप्रति आफूहरू जवाफदेही रहेको उनले बताए । उनले देशलाई तस्करको ‘ट्रान्जिन्ट’ बनाउनेलाई राजनीतिक रङ दिएर छुट दिन नहुने पनि बताए ।
“जनताको नजरमा नेपाल तस्करहरूको देश, तस्करको ट्रान्जिट पोइन्ट, भ्रष्टाचारी, कमिसन खोरको देश परिचित गराउने र धर्म, जातीयतालाई राजनीतिक रङ दिएर देशलाई अस्थिरतातिर लैजाने, यो उपलब्लिाई समाप्त गर्न खोज्ने प्रवृत्तिलाई सरकारले, संसद्ले छुट दिने छैन,” उनले भने ।
