काठमाडौं । चिनियाँ स्मार्टफोन निर्माता कम्पनी साओमीले आफ्नो पहिलो विद्युतीय गाडी (ईभी) मोडल एसयू७ को डेलिभरी यसै महिना (मार्च)देखि थाल्ने जनाएको छ ।
चीनको पाँचौँ ठूलो कम्पनीले विबोमा पोस्ट राख्दै देशभरका २९ सहरमा ५९ स्टोरले अर्डर लिने उल्लेख गरिएको छ ।
कम्पनीले मार्च २८ मा लन्च इभेन्ट राखेको छ । घोषणासँगै कम्पनीको सेयर मंगलबार बिहान पौने १० बजे (नेपाली समय)सम्म ९.५५ प्रतिशतले बढेको छ ।
चीनमा ईभीको बजार जनवरीदेखि फेब्रुअरीमा १८ प्रतिशतले बढेको छ । सन् २०२३ मा त्यहाँ ईभीको बजार २१ प्रतिशतले बढेको थियो ।
चीनको नम्बर एक विद्युतीय गाडी ब्रान्डका रूपमा बीवाईडी रहेको छ ।
गत डिसेम्बरमा साओमीको स्पिड अल्ट्रा ७ (एसयू७) सेडान सार्वजनिक गर्दा कम्पनीका प्रमुख कार्यकारी लेई जुनले विश्वको शीर्ष पाँच अटोमेकरमध्ये एक बन्ने लक्ष्य रहेको बताएका थिए ।
एसयू७ मा ७३.६ किलोवाट क्षमताको ब्याट्रीले ६०० किलोमिटर रेन्ज दिन्छ । १०१ किलोवाट क्षमताको ब्याट्रीले ८०० किलोमिटरभन्दा बढी रेन्ज दिने जनाइएको छ । रोयटर्सबाट ।
