कामठमाडौं । महाशिवरात्रि पर्वको अवसरमा गौशालास्थित पाशुपत क्षेत्रमा बिहानैदेखि भीड छ । भीडलाई मध्यनजर गरेर उपत्यका ट्राफिक प्रहरीले सवारी व्यवस्थापन मिलाएको छ । आवश्यकता अनुसार सवारी साधनलाई विभिन्न डाइभर्सन गरिएको छ ।

गौशाला क्षेत्रतर्फ जाने सवारी साधनलाई चावहिल, पुरानो–बानेश्‍वर, ज्ञानेश्‍वर, मैतिदेवीमोड, रातोपुल, सेतोपुल, कालोपुल, सिफलचौर, कुटुवहाल, गौरीघाट र तिलगंगाबाट आवश्यकताअनुसार डाइभर्सन गरिएको छ । 

त्यसैगरी मालवाहक सवारी साधनहरूलाई भने तीनकुने, जोरपाटी नारायणटार, चुच्चेपाटी, चावहिल, सिनामंगलपुल र बसुन्धराबाटै डाइभर्सन गरिएको छ ।

पशुपती दर्शनका लागि जाने भक्तजनहरुको सवारी पार्किङका लागि ट्राफिक प्रहरीले सिफल चौर, सरकारी र सुुरक्षाकर्मीहरुको सवारीका लागि कोषको कार्यायल परिसर र भण्डारखाल, तिर्थयात्रीका लागि तिलगंगाको खाली स्थान र करिडोर क्षेत्रतर्फ, शिविर सञ्चालक र दमकल एम्बुलेन्सहरु वनकालीमा राख्ने व्यस्वस्था गरेको छ ।