काठमाडौं । पुरुष तथा महिला कबड्डी सुपर लिग बुधबारदेखि त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा सुरु भएको छ ।
पहिलो दिन पुरुषतर्फ त्रिभुवन आर्मी क्लबले सशस्त्र प्रहरी बलको एपीएफलाई ३९–२२ ले पराजित गर्यो । आर्मीका प्रदीप मिजार ‘म्यान अफ दी म्याच’ घोषित भए ।
पुरुषतर्फ नै नेपाल प्रहरी क्लबले उपत्यका टोलीबाट ‘वाक ओभर’ पाएको आयोजक अखिल नेपाल कबड्डी संघले जनाएको छ ।
महिलातर्फ प्रहरीले एपीएफलाई ३८–३० ले हरायो । प्रहरीकी मानमति बिष्ट ‘प्लेयर अफ दी म्याच’ चुनिइन् ।
दुवै समूहमा शीर्ष तीन स्थान हासिल गर्नेले क्रमशः २५ हजार, १५ हजार र ११ हजार रुपैयाँ नगद पुरस्कार प्राप्त गर्नेछन् । प्रत्येक खेलको म्यान अफ दी म्याचलाई दुई हजार ५०० रुपैयाँ पुरस्कार प्रदान गरिनेछ ।
प्रतियोगिताको पुरुषतर्फ चार र महिलातर्फ तीन टिम सहभागी छन् । सिंगल राउन्ड रोबिन पद्धतिअनुसार शीर्ष दुई स्थानमा रहने टिमबीच उपाधि भिडन्त हुनेछ ।
