काठमाडौं । नेकपा (एमाले)का उपमहासचिव प्रदीप ज्ञवालीले वाम एकता गर्ने विषयमा पार्टी हतारिने पक्षमा नरहेको बताएका छन् । प्रधानमन्त्री एवं नेकपा (माओवादी केन्द्र)का अध्यक्ष  पुष्पकमल दाहाल ‘प्रचण्ड’ले नयाँ सत्तासमीकरणलाई वामपन्थी एकताको सुरुआतका रूपमा चित्रण गरिरहेका बेला उनले त्यसमा हतार गरिहाल्ने अवस्था नरहेको बताएका हुन् ।

न्युज एजेन्सी नेपालसँगको कुराकानीमा उपमहासचिव ज्ञवालीले कार्यकर्ता तहमै भावनात्मक एकता नभएसम्म गरिएको एकीकरण नटिक्ने विगतको अनुभव रहेको दृष्टान्त प्रस्तुत गरे । उनले अहिले वामपन्थी एकता, सहकार्य, पार्टी एकीकरणलगायत विषयमा कुनै छलफल नभएको बताए ।

आफ्नो पार्टी सरकारमार्फत व्यवस्थामाथि परेको संकट र जनतामा बढेको निराशालाई चिर्ने विषयमा केन्द्रित रहेको उनको भनाइ छ ।

न्युज एजेन्सी नेपालसित प्रदीप ज्ञवालीले व्यक्त गरेको भनाइ पढ्नोस्–
अहिले त हामी यो संसद्भित्रबाट राजनीतिक स्थायित्व दिने कुरामा केन्द्रित छौँ । त्यहाँ चाहे नेकपा (माओवादी केन्द्र)सँग होस्, नेकपा (एस)सँगको कुरा होस् । किनभने, हिजो हामीले गरेको एकता बडो सदाशयतापूर्वक गरेका थियौँ । अत्यन्त उत्साहित पनि थियौँ, तर टिकेन । त्यसो भएको हुनाले विगतका पाठहरूलाई हेर्दै तल उपयुक्त वातावरण नबनीकन, कार्यकर्ता तहमै त्यसले भावनात्मक रूपमा एकता नभईकन माथिको जोडघटाउबाट बनेको एकताचाहिँ टिक्दो रहेनछ भन्ने कुरा यहाँनिर देखिएको छ । त्यसले गर्दाखेरि अहिले हामी त्यसमा हतारिदैनौँ । सरकार बलियो बनाऊँ, सरकार टिकाऊँ, सरकारबाट डेलिभरी दिऊँ । दलहरूका बीचमा केही नीतिगत भिन्नताहरू छन् । केही भावनात्मक भिन्नताहरू छन् । केही शैलीगत भिन्नताहरू छन् । त्यसमा स्वस्थ बहस चलाउँदै जाऊँ । र, त्यो कामले विस्तारैविस्तारै एउटा भावनात्मक एकता बनाउँदै लग्यो, भावनात्मक रूपमा निकटता ल्याउँदै गर्‍यो भने सुदूरभविष्यको कुरालाई हामीले इन्कार गर्न सकिँदैन । हामी त सदैव हाम्रो देशमा मूलतः दुईवटा पार्टी बनून, एउटा सेन्टर टु राइट होस्, एउटा सेन्टर टु लेफ्ट होस् र एउटा स्थिर राजनीतितिर मुलुक अगाडि बढोस् भन्ने पक्षमा छौँ । ढिलोचाँडो मुलुक राजनीतिक ध्रुवीकरणतिर जानैपर्ने हुन्छ । र, त्यो ध्रुवीकरणको एउटाको नेतृत्व निःसन्देह एमालेले गर्ने हो । अर्को ध्रुवको नेतृत्व कांग्रेसले गर्ने हो । तर, अहिले हामी त्यो वामपन्थी एकता, सहकार्य, पार्टी एकता त्यसको कुनै पनि विषयमा छलफल गरिरहेका छैनौँ । अहिलेचाहिा एउटा वैकल्पिक सरकार बनाउने र सरकारको तहबाट डेलिभरी दिएर अहिले प्रणालीमा आइरहेको संकट र जनतामा बढेको निराशालाई चिर्ने कुरामा हाम्रो सम्पूर्ण फोकस त्यहाँनेर छ ।”