काठमाडौं । परराष्ट्रमन्त्री एनपी साउदको फिनल्यान्ड भ्रमण रद्द भएको छ । मन्त्री साउद दोस्रो 'यूएन एलडीसी फ्युचर फोरम'मा सहभागी हुन आज राति २ बजे फिनल्यान्डको हेलसिन्कीतर्फ जाने तालिका थियो । उनी कतार हुँदै फिनल्यान्ड जाने तय भएको थियो ।

तर, प्रधानमन्त्री पुष्पकमल दाहाल 'प्रचण्ड'को नजान निर्देशनपछि मन्त्री साउदले भ्रमण रद्द गरेका हुन् ।

भ्रमणबारे परराष्ट्र मन्त्रालयले विज्ञप्ति निकालेको आधा घण्टापछि परराष्ट्र सचिवलाई फोन गरेर मन्त्री साउदले आफू जान नसक्ने जानकारी दिएको परराष्ट्र स्रोत बताउँछ ।

यसअघि तत्कालीन परराष्ट्रमन्त्री विमला पौडेलले पनि जेनेभा उड्नै लागेका बेला भ्रमण रद्द गरेकी थिइन् । त्यतिबेला पनि प्रचण्डले भ्रमण रद्द गर्न निर्देशन दिएका थिए । त्यसलगत्तै सरकारबाट एमाले बाहिरिएको थियो ।