काठमाडौं । रोमाञ्चक खेलमा नामिबियालाई तीन रनले हराउँदै घरेलु टिम नेपालले त्रिदेशीय शृंखलाको फाइनलमा पुग्ने सम्भावना कायम राखेको छ । 

शुक्रबार कीर्तिपुरस्थित त्रिवि क्रिकेट मैदानमा नेपालले प्रस्तुत गरेको १८१ रनको लक्ष्य पछ्याउने क्रममा नामिबियाले निर्धारित २० ओभरमा सात विकेट गुमाएरु १७७ रनमात्र जोड्न सक्यो ।

त्रिवि क्रिकेट मैदानमा लगातार चार हारपछि नेपालले जित निकालेको हो । यसअघि नेपालले लिग–२ अन्तर्गत शृंखलाको अन्तिम दुई खेल र ट्वान्टी–२० शृंखलाको सुरुआती दुई खेल गरी लगातार चार खेलमा हार बेहोरेको थियो । 

नामिबियालाई जितका लागि अन्तिम ओभरमा १२ रन आवश्यक हुँदा नेपालका कप्तान रोहितकुमार पौडेलले बलिङका लागि करणलाई जिम्मेवारी सुम्पिएका थिए । करणको पहिलो बलमा जान ग्रिनले एक रन लिए । दोस्रो बलमा रुबेन ट्रम्पेलमेनले पनि एक रन लिए । करणले तेस्रो बल डट फ्याकेपछि नामिबियालाई अन्तिम तीन बलमा जितका लागि १० रनको आवश्यकता थियो । चौथो बललाई अम्पायरले वाइडको इशारा गरेपछि करणले एक बल धेरै गर्नुपरेको थियो । 

चौथो बलमा पनि करणले ग्रिनलाई एक रन दिए । जितका लागि दुई बलमा आठ रन हुँदा ट्रम्पेलमेनले करणको पाँचौँ बलमा लामो प्रहार गर्न खोजे पनि कप्तान रोहित पौडेलबाट क्याच भएपछि खेलमा नेपालले नियन्त्रण बनाएको थियो । अन्तिम बलमा बर्नार्ड स्कोल्जले चौका प्रहार गरे पनि नेपालले तीन रनको रोमाञ्चक जित निश्चित गर्दै शृंखलाको फाइनल सम्भावना कायम राखेको हो । 

नामिबियाबाट आक्रामक रूपमा प्रस्तुत भएका कप्तान जेजे स्मिथले २६ बलमा ६ चौका र दुई छक्कासहित ५० रनको अर्धशतकीय इनिङ खेले । ट्वान्टी–२० अन्तर्राष्ट्रिय क्रिकेटमा स्मिथको यो तेस्रो अर्धशतक हो । ५०–३ को अवस्थामा ब्याटिङका निम्ति आएका उनले चौथो विकेटका लागि जान फ्राइलिन्कसँग ८३ रनको साझेदारी गर्दै नामिबियाको इनिङ उकासेका थिए । 

फ्राइलिन्कले २९ बलमा एक चौका र दुई छक्कासहित ३७ रन बनाए । १६औँ र १७औँ ओभरमा यी दुईको साझेदारी तोड्दै तीन विकेट लिएपछि नेपालले खेलमा फर्किएको थियो । १६औँ ओभरको पहिलो र दोस्रो बलमा दीपेन्द्रसिंह ऐरीले लगातार स्मिथ र जान निकाले लोफ्टी इटोनलाई पभेलियनको दिशा देखाएका थिए ।

यस्तै, १७औँ ओभरको पहिलो बलमा अभिनाश बोहराले ३७ रन बनाएका फ्राइलिन्कलाई बोल्ड गरेका थिए । नामिबियाको स्कोरबोर्डमा जेपी कोएट्जले २५, जान ग्रिनले २३, रुबेन ट्रम्पेलमेनले १४ र माइकल भान लिन्गेनले १० रन थपे । 

नेपालका करण केसी, सोमपाल कामी र दीपेन्द्रले समान दुई विकेट लिए । अभिनाश बोहराले एक विकेट हात पारे । त्यसअघि कुशल मल्लले अर्धशतक बनाएपछि टस हारेर ब्याटिङमा आएको नेपालले निर्धारित २० ओभरमा आठ विकेट गुमाएर १८० रनको योगफल खडा गरेको थियो । 

नेपालबाट कुशलले अविजित ५५ रन बनाए । ट्वान्टी–२० अन्तर्राष्ट्रिय क्रिकेटमा चौथो अर्धशतक प्रहार गरेका कुशलले ३७ बलमा एक चौका र चार छक्का प्रहार गरे । सात ओभरमा ६४–४ को नाजुक अवस्थाबाट कुशलले आरिफ सेखसँग पाँचौँ विकेटका लागि ८५ रनका साझेदारी गर्दै नेपालको इनिङ उकासेका थिए ।

१६.३ ओभरमा ज्याक ब्रासेलले जान फ्राइलिन्कबाट क्याच गराउनुअघि आसिफ सेखले २४ बलमा चार चौकासहित ३१ रन बनाए । यसबाहेक, नेपाली टिमको खातामा गुल्सनकुमार झाले १६ बलमा एक चौका र तीन छक्कासहित २६ रन जोडे ।

अनिल साहले १७ बलमा तीन छक्कासहित २३ रन थपे । दीपेन्द्र आठ बलमा दुई चौकासहित १६ रन जोडेर आउट भए । कप्तान रोहितले १० रन बनाए । नामिबियाका बेन सिकोन्गोले तीन विकेट लिए । चार ओभर बलिङ गरेका सिकोन्गोले २८ रन खर्चिए । ज्याक ब्रासेलले दुई विकेट लिए । रुबेन ट्रम्पेलमेन, ज्यान निकोल लोफ्टी–इटोन र बर्नार्ड स्कल्जले एक–एक विकेट लिए ।

नेपाल, नामिबिया र नेदरल्यान्ड्स सहभागी शृंखलामा नेपालको तेस्रो खेल हो । नेपालले अब लिग चरणको अन्तिम खेलमा शनिबार नेदरल्यान्ड्सविरुद्ध खेल्नेछ । डबल राउन्ड रोविन पद्धतिमा सञ्चालित प्रतियोगिताको शीर्ष दुई टिम उपाधिका लागि भिड्नेछन् ।