काठमाडौं । सत्ताको नेतृत्वकर्ता दल नेकपा (माओवादी केन्द्र)का नेताहरूले राष्ट्रियसभाको अध्यक्ष पद कुनै पनि हालतमा नछाड्न प्रधानमन्त्री समेत रहेका पार्टी अध्यक्ष पुष्पकमल दाहाल ‘प्रचण्ड’लाई दबाब दिएका छन् । मंगलबार केन्द्रीय कार्यालय पेरिसडाँडामा बसेको स्थायी कमिटीको बैठकमा नेताहरूले ‘उदार’ नबन्न आग्रह गरेका हुन् ।

“हाम्रा अध्यक्ष अलिक बढी उदार हुनुहुन्छ । उहाँले छोड्न पनि सक्नुहुन्छ । राष्ट्रियसभा अध्यक्ष कुनै पनि हालतमा छाड्नु हुँदैन भन्ने दबाब दिएका छौँ,” बैठकमा सहभागी एक नेताले बाह्रखरीसित भने ।

उनका अनुसार, राजनीतिमा सधैँ उदारता काम नलाग्ने भन्दै निर्वाचनबाट पाएको ‘धोका’लाई स्मरण गर्न अध्यक्षलाई नेताहरूले सुझाव दिएका छन् ।

बैठकमा सहभागी अर्का एक नेताका अनुसार, प्रचण्डले गठबन्धनका निम्ति राष्ट्रियसभा अध्यक्ष पद छाड्न तयार रहेको संकेत गरेका थिए । “उहाँले गठबन्धनका लागि म छाड्न पनि सकारात्मक छु भन्ने खालको संकेत गर्नुभएको छ,” ती नेताले भने ।

नेताहरूले प्रधानमन्त्री पद गुमेपछि संवैधानिक परिषद्को बैठकमा माओवादी केन्द्रको उपस्थिति शून्य हुने स्थितिको मूल्यांकन गर्न अध्यक्ष प्रचण्डलाई सुझाव दिएका छन् । अहिलेको अवस्थामा प्रचण्ड प्रधानमन्त्रीबाट हटेपछि संवैधानिक परिषद्मा माओवादीको उपस्थित हुने सम्भावना छैन ।

राष्ट्रियसभा अध्यक्षको निर्वाचन यही फागुन २९ गते गर्ने कार्यतालिका छ । सत्ता गठबन्धनमा त्यसबारे औपचारिक संवाद भने भएको छैन ।

राष्ट्रियसभा अध्यक्षमा नेपाली कांग्रेसका कृष्णप्रसाद सिटौलाको दाबी छ । माओवादी र नेकपा (एकीकृत समाजवादी)ले पनि सो पद लिन खोजेका छन् ।

हालैको कांग्रेस महासमितिमा जनयुद्ध बेठिक थियो भन्ने प्रंसगका विषयमा पनि माओवादी बैठकमा छलफल भएको ती नेताले जानकारी दिए ।

यस्तै, महासमितिमा कांग्रेसीले हिन्दुराज्यको विषय उठाउँदा प्रचण्ड मौन रहेको भन्दै माओवादी नेताहरूले बैठकमा आपत्ति जनाएका थिए ।

“गठबन्धनभित्रकै दलमा संविधानभन्दा विपरीत कुरा आएका छन् । यो विषयमा हामी गम्भीर बन्नुपर्छ, अध्यक्ष (प्रचण्ड) किन बोल्नु हुन्न ?,” बैठकमा भएको छलफल एक नेताले सुनाए ।

गठबन्धनभित्र राजनीतिक इमानदारिता हुुनुपर्नेमा माओवादी नेताहरूले जोड दिएका थिए ।