काठमाडौं । यस वर्षको दादुरा–रुबेला खोप कार्यक्रम आजदेखि सुरु भएको छ । ५७ लाख ४२ हजार ९९३ बालबालिका लक्षित अभियानमा नियमित खोप छुटेको भए दिने व्यवस्था मिलाइएको छ । 

जाजरकोट र रुकुमबाहेकका ७५ जिल्लामा खोप दिन लागिएको हो । तराई र काठमाडौं उपत्यकासहित २४ जिल्लामा ९ महिनादेखि १५ वर्षसम्मका बालबालिकालाई खोप दिइनेछ । १५ महिनाभित्र दादुरा–रुबेला खोप लगाए पनि अभियानका क्रममा खोप लगाउनैपर्ने शाखाले जनाएको छ । 

त्यस्तै, यो अभियानमा खोप लगाए पनि १५ महिनाभित्रका बालबालिकालाई नियमित रूपमा दादुरा–रुबेला खोप लगाउनै पर्छ ।  खोप लगाइसेकपछि केही सामान्य असरहरू देखिए नआत्तिन र कम्तीमा आधा घण्टासम्म खोप केन्द्रमा नै बसिरहन खोप शाखा प्रमुख डा.अभियान गौतमको सुझाव छ । 

उनका अनुसार केही बालिबालिकामा खोप लगाएको केही समयपछि हल्का ज्वरो आउने, शरीरमा दादुरा जस्तै बिमिराहरू आउने जस्ता सामान्य लक्षण देखिन सक्छन् । 

गम्भीर प्रकारका कुनै समस्या देखिए तुरुन्त स्वास्थ्यकर्मीको सल्लाह लिन उनको सुझाव छ । रोग प्रतिरोधी क्षमता कम भएको अवस्थामा, सिकिस्त बिरामी भएको बेला, उपचार सुरु नगरेका क्षयरोगीलाई भने यो खोप दिनु हुँदैन ।