काठमाडौं । प्रमुख प्रतिपक्ष नेकपा (एमाले)का सांसद योगेश भट्टराईले त्रिभुवन विश्वविद्यालय (त्रिवि)को उपकुलपति नियुक्ति प्रक्रिया नेकपा (माओवादी केन्द्र)को गुटगत लडाइँको मारमा परेको बताएका छन् । बिहीबार प्रतिनिधिसभा बैठकमा उनले तटस्थ भएर त्रिविको उपकुलपति नियुक्त गर्ने भनेका प्रधानमन्त्रीले न्यूनतम प्रक्रिया समेत पालना नगरेको बताए ।

उनले पार्टीका नेताहरू सिफारिस समितिमा बसेका र उपप्राध्यापकले उपकुलपति हुने व्यक्तिको अन्तर्वार्ता लिएको जिकिर गरे । “विशिष्ट प्रक्रिया अपनाउँछु भन्दै उपकुलपति नियुक्तिको प्रक्रिया थाल्नुभएका प्रधानमन्त्रीले पार्टीका नेताहरूलाई सिफारिस गराउनुभएको छ । सिफारिस भएका व्यक्तिको अन्तर्वार्ता उपप्राध्यापकले गरेका छन्,” सांसद भट्टराईले भने, “उपकुलपतिको अन्तर्वार्ता उपप्राध्यापकले गर्छ ? माओवादीको गुटगत झगडाको मारमा उपकुलपति नियुक्ति पर्दै छ ।”

उनले अहिलेको नियुक्ति प्रक्रिया गलत भएको भन्दै तत्काल त्यो रद्द गरेर नयाँ थाल्न पनि माग गरे ।