काठमाडौं । सोलुखुम्बुको दुधकोसी गाउँपालिकाका ५१ वर्षीय राजु घिमिरे भन्ने काजी विश्वकर्माले श्रीमतीसहित तीनजनाको हत्या गरेर आफूले आत्महत्या गरे ।

हाल काठमाडौंको सीतापाइलास्थित बद्री बजगाईंको घरमा भाडामा बस्दै आएका विश्वकर्माले बुधबार बिहान श्रीमती, छोरी र नातिनीको हत्या गरेका हुन् । श्रीमती ३९ वर्षीया ईश्वरी श्रेष्ठ भनिने प्रेमकुमारी श्रेष्ठ, आठ वर्षीया छोरी अनिसा र साढे दुई वर्षीया नातिनी सिबनाको हत्या गरेका थिए । 

हत्यालगत्तै राजु आफूले समेत घटनास्थलबाट साढे तीन किलोमिटरमाथिको जंगलको रुखमा झुन्डिएर आत्महत्या गरेका थिए । राजुसहित चारजनाकै शव पोष्टमार्टका लागि शिक्षण अस्पताल महाराजगञ्जमा राखिएको छ । 

काठमाडौं प्रहरीका प्रमुख एसएसपी भुपेन्द्र खत्रीका अनुसार राजुले श्रीमतीसँगको आन्तरिक विवादका कारण सामूहिक हत्या गरेर आत्महत्या गरेको खुलेको बताए ।

राजुसँगै बस्दै आएका बुहारी जेनी श्रेष्ठ भने घरबाहिर हुँदा जोगिएकी छन् । जेनी कामका लागि बिहानै घर बाहिर निस्केको अवस्थामा घटना भएको खुलेको हो ।

छोरालाई बचाउन पठाएका थिए पसल 
प्रहरीको अनुसन्धानले उनका १५ वर्षीय छोरा अनिस श्रेष्ठलाई बचाउनकै लागि पसल पठाएको खुलाएको छ । 

“राजुले छोराको माया धेरै नै गर्ने रहेछ । त्यसैले छोरालाई बाहिर पठाएर हत्या गरेको देखिन्छ,” अनुसन्धानमा खटिएका प्रहरी अधिकारीले भने ।

हत्यालगत्तै बाहिर निस्कन खोजेका राजु र पसल पठाएका छोरा अनिसको भेट कोठाको ढोकामै भएको थियो । आमासहित तीनजनाको हत्या गरेको भन्दै अनिसकै मोबाइलमा भिडियो रेकर्ड गर्न समेत राजुले लगाएका थिए । अनिसको मोबाइलबाट प्रहरीले उक्त भिडियो फेला पारेको छ ।

काठमाडौं प्रहरीका एसएसपी खत्रीले भिडियो फेला परेको र थप अनुसन्धान जारी रहेको बताए ।  प्रहरी स्रोतका अनुसार उक्त भिडियोमा राजुले श्रीमती ईश्वरीका कारण मारेर आफू मर्न बाध्य भएको बताएका छन् । 

उनले भिडियोमा बुहारी जेनीलाई सम्बोधन गरेर भनेका थिए, “मैले मार्ने र मर्ने भनेको कुरा सबै पूरा गरे । चितवनको केटासँगको सम्बन्ध र नरेशसँगको कुरा पनि तिमीलाई थाहा छ । यो कुरा पहिला नै थाहा पाएको भए यस्तो घटना हुने थिएन ।”

करिब पाँच मिनेट लामो भिडियो रेकर्डमा राजुले थप भनेका छन्, “कसरी राम्रो हुन्छ त्यसरी गर्नु । आमा जस्तो भएर नहिँड्नु । सुन र पैसा सबै दराजमा छ । चाबी मैले छोरो अनिसलाई दिएको छु । सबै कुरा अनिसलाई थाहा छ । अनिसको राम्रो हेरचाह गर्नु, नराम्रो नगर्नु ।”

प्रहरीले पिछा गर्दागदै आत्महत्या
राजुले श्रीमतीसहित तीनजनाको हत्या गरेको करिब तीन घन्टापछि मात्रै आत्महत्या गरेको खुलेको छ । काजीले हत्यालगत्तै छोरा अनिसलाई भिडियो सन्देश बनाउन लगाए । त्यसलगत्तै उनले सासू रूकमाया श्रेष्ठ, ससुरा इन्द्रजित श्रेष्ठ र साली संगीतालाई समेत फोन गरेका थिए ।

साली र सासू–ससुरालाई समेत छोराको भविष्य बनाई दिन आग्रह गरेका छन् । त्यही बेला रूकमायाले प्रहरीलाई फोन गरेर घटनाबारे जानकारी गराएकी थिइन् । 

प्रहरीले सूचना पाएलगत्तै प्रहरी वृत्त स्वयम्भूकी प्रहरी प्रमुख डीएसपी पूर्णिमा चन्द नेतृत्वको टोली घटनास्थल पुग्यो । केही समयपछि काठमाडौं प्रहरी परिसरका डीएसपी हरि खतिवडा र उपत्यका अपराध अनुसन्धान कार्यालयका एसएसपी सोमेन्द्रसिंह राठौरको टोली समेत घटनास्थल पुगेको थियो ।

प्रहरी घटनास्थल पुग्दा ९ बजिसकेको थियो । त्यो बेलासम्म पनि राजुको मोबाइलमा फोन गइरहेको थियो । तर, प्रहरीले सूचना पाएपछि भने उनले फोन उठाउन छाडे ।

प्रहरी उनको मोबाइल फोन ट्रयाक गरेर पिछा गर्दै नजिक पुगिसकेको थियो । साढे १० बजे भने उनले मोबाइल फोन अफ गरे । मोबाइल फोन अफ भएको एक घन्टापछि झुन्डिएको स्थानमा प्रहरी पुगेको थियो । 

अदालतमा थियो बलात्कार मुद्दा
राजु र ईश्वरीको करिब १८ वर्षअघि प्रेम विवाह भएको हो । राजुसँग ईश्वरीको दोस्रो बिहे थियो । पहिलेको श्रीमान्सँग कानुनीरूपमा सम्बन्धविच्छेद गरेपछि उनले राजुसँग प्रेम विवाह गरेकी थिइन् । पहिलो श्रीमान्बाट भएको एक छोरा समेत आफैँसँग ल्याएर राजुसँग बिहे गरेकी थिइन् । राजुसँगको बिहेपछि थप एक छोरा र एक छोरीलाई जन्म दिएकी थिइन् । जसमध्ये छोरी अनिसाको हत्या भएको हो । 

आफूसँग बिहे भएपछि पनि ईश्वरीको एक पुरुषसँग अवैध सम्बन्ध रहेको राजुले थाहा पाएका थिए । उक्त सम्बन्धबारे थाहा पाएपछि पनि राजुकै सल्लाहमा ईश्वरीले ती पुरुषविरुद्ध प्रहरीमा बलात्कार मुद्दाको जाहेरी दिएकी थिइन् । 

प्रहरीले ती पुरुषलाई पक्राउ गर्‍यो । तर, बलात्कार मुद्दाको आरोप खेपिरहेका ती पुरुष केहीदिन अघिमात्रै जिल्ला अदालत काठमाडौंबाट पाँच लाख धरौटीमा छुटेको खुलेको छ । ईश्वरीको मुद्दा अदालतमै विचाराधीन छ । सोही अवस्थामा भने श्रीमान्ले ईश्वरीसहित छोरी र नातिनीको समेत हत्या गरेर आफूले समेत आत्महत्या गरे ।