काठमाडौं । अर्थमन्त्री डा.प्रकाशशरण महतले बिग्रिएको अर्थतन्त्र आफूले सुधारेको दाबी गरेका छन् । 

सोमबारदेखि गोदावरीमा जारी नेपाली कांग्रेसको महासमितिको मंगलबारको बैठकमा मुलुकको वर्तमान आर्थिक अवस्था विषयक प्रतिवेदन पेस गर्दै अर्थमन्त्री डा. महतले यस्तो दाबी गरेका हुन् । उनले सरकारमा चैतमा अर्थमन्त्री भएर अर्थ मन्त्रालयको जिम्मेवारी सम्हालेपश्चात खुम्चिएको आर्थिक वृद्धि, स्रोतमा रहेको चापको अवस्था, असन्तुलन रहेको वाह्य क्षेत्रलगायतको सुधार गरेको जिकिर गरे । 

अर्थमन्त्री महतले अर्थ मन्त्रालयको कार्यभार सम्हाल्दा अर्थतन्त्रका अधिकांश परिसूचक अनुकूल अवस्थामा भए पनि कार्यभार सम्हालेको ११ महिनामा अर्थतन्त्रका अधिकांश सूचकहरू सकारात्मक बनाउन सफल भएको उल्लेख गरे । महतले पर्यटक आगमन, होटेल र रेस्टुरेन्ट, निर्माण, उत्पादन, खुद्रा र होलसेल व्यापार समेत बढेको सभालाई जानकारी दिए । 

नेपालमा रेमिट्यान्स उल्लेखनीय रूपमा बढेको, विद्युत् उत्पादन र निर्यात बढेको, घरजग्गा र सेयर बजार कारोबार वृद्धि हुँदै गएको र सार्वजनिक खर्च बढ्दो क्रमा रहेको उल्लेख गरे । आगामी दिनमा सरकारको पूँजीगत खर्च वृद्धि हुने विश्वास रहेको उनले बताए । सरकारको बजेट प्रणाली र बजेट विनियोजनभन्दा बाहिर गई लगाइएका ठेक्का थुप्रिएको रहेका आयोजनालाई  रोक्ने काम गरेको बताए ।

उनले निजी क्षेत्रमा निराशा रहेकोमा अहिले मनोबल उच्च बनाएको बताए । समष्टिगत अर्थतन्त्रका अधिकांश परिसूचकमा सुधारसँगै अन्तर्राष्ट्रिय मुद्राकोषले गरेको प्रक्षेपणअनुसार सन् २०२५ मा ५.० प्रतिशत आर्थिक वृद्धि हुने अनुमान रहेको पनि जानकारी गराए ।