काठमाडौं । जिल्ला प्रशासन कार्यालय पर्सामा बसेको सर्वदलीय बैठकले पाँचबुँदे निर्णय गरेको छ । 

रौतहटमा सरस्वती मूर्ति सेलाउन जाने क्रममा दुई समुदायबीच झडप भएको थियो । सोही विवाद वीरगञ्जमा पनि भएपछि पर्सा प्रशासनले वीरगञ्जमा सोमबारदेखि नै कर्फ्यु जारी गरेको छ ।  

बैठकले सयौँ वर्षदेखि कायम रहेको जातजाति, भाषा, धर्म, समुदाय सम्प्रदाय बीचको एकतालाई मजबुत गराई सु–सम्बन्ध एवं एकतालाई विखण्डन गर्न खोज्ने जुनसुकै दुष्प्रयासलाई निष्फल पार्न सामूहिक प्रतिबद्धता गर्ने निर्णय गरेको छ । 

एकअर्काको धार्मिक स्थलहरूमा नाराबाजी, जुलुस लगायतका विरोधका कार्यक्रम नगर्ने/नगराउने र त्यस्ता गतिविधि गर्ने जोसुकैलाई कानुनी कारबाही गर्ने निर्ण गरिएको छ । 

जिल्लाभित्र खुलमखुला डिजे बजाउने र चर्को माइक बजाउने कार्य रोक्ने, लाठी, भाला, राके जुलुस निकाल्ने लगायतका क्रियाकलाप गर्नेविरुद्ध कानुनबमोजिम कारबाही गर्न प्रशासनसमक्ष अनुरोध गर्ने र यस अभियानमा सबैले सहयोग गर्ने निर्णय पनि गरिएको छ ।

यस्तै, शान्ति सुरक्षा र अमनचयनलाई खलल पार्ने किसिमका धार्मिक, सामाजिक, सांस्कृतिक सद्भाव बिगार्ने एवं द्वन्द्वलाई उक्साउने प्रकारका अवान्छित गतिविधिहरू, धार्मिक सम्प्रदायिक र र्‍याली, जुलुस, बन्द हडताल लगायतका कुनै पनि गतिविधिहरू कुनै पनि संघ, संस्था एवं समुदायले नगर्ने, सामाजिक सञ्जालमा एक–अर्कालाई लक्षित गरेर लेख्ने प्रवृत्तिलाई निरुत्साहित गर्ने पनि निर्णय गरिएको छ ।