काठमाडौं । पवित्रा ढकाल स्मृति कोषले ‘प्रतीक ढकाल नियात्रा सौरभ–२०८१’ नेपाली नियात्रासाहित्यमा समर्पित सर्जक घनश्याम राजकर्णिकारलाई प्रदान गर्ने निर्णय गरेको छ । 

कोषले हरेक वर्ष श्रीपञ्चमीका दिन पुरस्कृत स्रष्टाको नाम घोषणा गरी आउँदो वर्षको जेठ १३ गतेका दिन उक्त सम्मान समर्पण गर्दै आएको छ । पुरस्कारकासाथ नगद राशि ५१ हजार रुपैयाँ समेत प्रदान गरिने कोषले विज्ञप्तिमार्फत जानकारी गराएको छ । 

वि.सं. २०७५ सालको श्रीपञ्चमीका दिन स्थापित कोषले यसअघि नियात्रा सर्जकहरू डा. तारानाथ शर्मा, शताब्दी वाङ्मयपुरुष सत्यमोहन जोशी, देविचन्द्र श्रेष्ठ, भुवनहरि सिग्देल र गीता खत्रीलाई उक्त सम्मान समर्पण गरिसकेको छ । 

पुरस्कृत नियात्राकार राजकर्णिकारका देश प्रदेशको भ्रमण (२०३४), विदेशको यात्रा : स्वदेशको सम्झना (२०३७), बौद्ध तीर्थयात्रा : नालान्दादेखि लुम्बिनीसम्म (२०६०), यात्रा अमेरिकाको माया नेपालको (२०६९), यात्राको लहरीमा हिउँफूलकी रानी (२०७४), घामै प्यारो आमै प्यारो (२०७७) आदि नियात्राकृतिहरू प्रकाशित छन् ।