काठमाडौं । आईसीसी पुरुष क्रिकेट विश्वकप लिग–२ त्रिकोणात्मक एकदिवसीय शृंखलाअन्तर्गत नामिबियाविरुद्धको उद्घाटन खेलमा नेपालले टस हारेको छ ।

कीर्तिपुरस्थित त्रिवि क्रिकेट मैदानमा नामिबियाका कप्तान जेराल्ड एरास्मसले टस जितेर पहिला फिल्डिङ रोजेका छन् । योसँगै नेपालले पहिला ब्याटिङ गर्नेछ ।

आजको खेलमा नेपाल र नामिबिया दुवै विजयी सुरुआत गर्न चाहन्छन् । पछिल्लोपटक घरेलु मैदानमा भएको खेलमा नेपालले नामिबियालाई हराएको थियो । नेपाल जितलाई निरन्तरता दिन चाहन्छ । नामिबिया भने उक्त हारको बदला लिने दाउमा छ ।

नेपालको प्लेइङ–११ मा कप्तान रोहितकुमार पौडेलसहित आसिफ शेख, कुशल भुर्तेल, कुशल मल्ल, पवन सर्राफ, भीम सार्की, अनिलकुमार साह, गुल्सन झा, सोमपाल कामी, करण केसी र ललित राजवंशी छन् । बेन्चमा सूर्य तामाङ, देव खनाल, दीपेन्द्रसिंह ऐरी र आरिफ शेख छन् ।

नामिबियाको प्लेइङ–११ मा कप्तान जेरार्ड एरास्मससहित जेन ग्रिन, जेजे स्मिथ माइकल भान लिंगेन, निकोल लोफ्टिइटन, जान फ्रिलिंक, रुबेन ट्रम्पलम्यान, निको डाभीन, टांगेनी लुंगामेनी, ज्याक ब्रेसल र बर्नार्ड स्कोल्ज छन् । बेन्चमा जेपी कोट्जे, मलान क्रुगर, बेन शिकोंगो र सन फौसी छन् ।

घरेलु मैदानमा आईसीसी पुरुष क्रिकेट विश्वकप लिग–२ को नयाँ ‘सर्कल’ आजदेखि सुरु भएको हो । लिगमा २४ त्रिदेशीय शृंखलाअन्तर्गत पहिलो ‘सिरिज’ नेपालमा भएको हो ।

आउँदो सन् २०२७ सम्म चल्ने उक्त लिग–२ मा नेपालसहित आठ टोलीको सहभागिता रहनेछ । पहिलो सिरिजमा नेपाल, नामिबिया र नेदरल्यान्यड्सबीच प्रतिस्पर्धा हुन लागको हो । रासस