काठमाडौं । नइ प्रकाशनको अक्षयकोष अभिवृद्धिका निम्ति डा. कपिलदेव उपाध्यायले थप पाँच लाख रुपैयाँ प्रदान गरेका छन् । उनले नइ प्रकाशनका कुलपति इन्दिरा प्रसाईलाई उक्त रकम हस्तान्तरण गरेका हुन् ।

डा. उपाध्यायले अक्षयकोषका लागि यसअघि ६ लाख रुपैयाँ प्रदान गरिसकेको प्रकाशनका सदस्यसचिव नरेन्द्रराज प्रसाईले जानकारी दिए ।

दुर्गम क्षेत्रका जेहेनदार विद्यार्थीको हितका निम्ति १० लाख रुपैयाँ राशिको ब्याजबाट ‘नइ कपिल विद्यापदक’को स्थापना गर्ने निर्णय गरिएको विज्ञप्तिमा उल्लेख छ ।

हरेक वर्ष जनही ३० हजार रुपैयाँ राशिसहित ‘नइ कपिल विद्यापदक’ दुर्गम जिल्लाका सरकारी विद्यालयबाट कक्षा–१२ मा सर्वोत्कृष्ट हुने दुई छात्रालाई प्रदान गरिने जनाइएको छ ।

प्रकाशनको अक्षयकोषमा हाल दुई करोड ६६ लाख रुपैयाँ मौज्दात रहेको विज्ञप्तिमा जनाइएको छ ।