काठमाडौं । महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले समाजकल्याण परिषद् र आईएनजीओको कामप्रति असन्तुष्टि जनाएका छन् ।

प्रतिनिधिसभाअन्तर्गतको सार्वजनिक लेखा समितिको सोमबारको बैठकमा उनले परिषद्को सुधार गर्न लागिएको बताए । परिषद्मा मन्त्रालयको कुनै हस्तक्षेप नभएको उनको भनाइ छ ।

“परिषद्ले गरेको काम सुधार गर्न र समाजको कल्याण हुने काम कसरी हुन्छ भनेर विशेष अदालतको पूर्वन्यायाधीशको नेतृत्वमा समिति बनाएका छौँ, रिपोर्ट केही दिनमा आउँछ,” उनले भने, “समाजकल्याणको काम सन्तुष्ट छैन । राज्यले प्राथमिकता तोक्नु छ ।”

एउटै आईएनजीओले एकै पार्टनर एनजीओ बनाएर काम गरेको उनले सुनाए । मन्त्रालयको बजेटभन्दा तीन गुना बढी रकम एउटै आईएनजीओले खर्च गर्ने गरेको उनले बताए ।

“एउटै आईएनजीओले एउटै पार्टनर एनजीओ बनाएर काम गरेको छ । मन्त्रालयको बजेटभन्दा तीन गुना बढी रकम एउटै आईएनजीओले खर्च गर्छ,” मन्त्री आचार्यले भने, “एक अर्बको कार्यक्रम आए २० करोड प्रशासनिक खर्च देखाउँछ । काम कम हुन्छ ।”

यस्तो कार्य समाजकल्याण परिषद्लाई थाहै नहुने उनले उल्लेख गरे । ठूला आईएनजीओले अर्थ मन्त्रालयमार्फत सिधै काम गर्ने गरेको उनले स्पष्ट पारे ।

“समाजकल्याण ऐन सुधार गरेर मन्त्रालयले चिन्ने नबनाए यसले उपलब्धि दिनै सक्दैन,” उनले भने, “भोलिको दिनमा परिवर्तन यसबाट चाहने भए सोच्न जरुरी छ ।”