![हिन्द महासागर अन्तर्राष्ट्रिय बजारमा पुग्ने ‘लाइफलाइन’ : मन्त्री साउद](https://12khari.top/uploads/posts/mcmg-1707561738.jpg)
काठमाडौं । परराष्ट्रमन्त्री एनपी साउदले नेपालको विकास आकांक्षा हिन्द महासागरमा निर्भर रहेको उल्लेख गरेका छन् । उनले हिन्दुकुश हिमालयको इकोसिस्टम र जलवायु अवस्था बुझ्ने माध्यमका रूपमा रहेको बताए ।
अस्ट्रेलियाको पर्थमा सातौँ इन्डियन ओसन कन्फरेन्स (सातौँ हिन्द महासागर सम्मेलन)मा मन्त्री साउदले सागर र हिमाली समस्या समाधान एकीकृत र समग्रमा गर्नुपर्नेमा जोड दिए ।
अस्ट्रेलिया सरकार र इन्डिया फाउन्डेसनको आयोजनामा जारी सम्मेलनमा उनले हिन्द महासागरलाई भूगोलका रूपमा सीमित नभई संसारको सभ्यताको केन्द्रका रूपमा रहेको बताए । उनले भने, “हिन्द महासागर भू–राजनीतिक, भू–रणनीतिक र भू–आर्थिक महत्त्वका दृष्टिकोणले हेर्नुपर्दछ ।”
मन्त्री साउदले थपे, “यहाँ दुःखका साथ भन्नुपर्छ, हिन्द महासागरले परम्परागत र गैरपरम्परागत दुवै सुरक्षा चुनौतीको सामना गर्नुपरेको छ । समुद्री आतंकवाद, डकैती, लागुऔषध र हतियारको ओसारपसार, मानव बेचबिखन, गैरकानुनी आप्रवासन एवं नेभिगेसनको स्वतन्त्रतामा अवरोधलगायत सुरक्षा चुनौतीहरू गम्भीर रूपमा खडा हुनु दुःखद छ ।”
हिन्द महासागर नेपालको वैदेशिक व्यापारका निम्ति एक हिस्सेदार र अन्तर्राष्ट्रिय बजारमा पुग्ने ‘लाइफलाइन’का रूपमा रहेको उनले उल्लेख गरे ।
नेपालले महासागरको महत्त्वलाई विश्वव्यापी जनहितका रूपमा मान्यता दिएको मन्त्री साउदले बताए । उनले समुद्री संरक्षण र दिगो उपयोग, मानव जातिको साझा हित, राष्ट्रिय अधिकार क्षेत्रभन्दा जैविक विविधताको संरक्षणमा जोड दिएको परराष्ट्र मन्त्रालयले जानकारी गराएको छ ।