काठमाडौं । नेपाली खेलकुदको प्रतिष्ठित एनएसजेएफ पल्सर स्पोर्ट्स अवार्ड–२०७९ वर्ष महिला खेलाडीको शीर्ष तीनजना सार्वजनिक भएको छ । 

नेपाल खेलकुद पत्रकार मञ्च (एनएसजेएफ)को खेलाडी छनोट समितिले शुक्रबार पत्रकार सम्मेलन गर्दै वर्ष महिला खेलाडीको शीर्ष तीनजना सार्वजनिक गरेको हो । माघ २८ गते आइतबार याक एन्ड यती होटेलमा आयोजना हुँदै छ ।

अवार्डको वर्ष उत्कृष्ट महिला खेलाडीमा बास्केटबलकी अनुशा मल्ल, एथलेटिक्सका पुष्पा भण्डारी र राजपुरा पछाईं पर्न सफल भएका छन् । उत्कृष्ट तीनबाट कार्यक्रमकै दिन विजेता चयन गरिने छनोट समितिका समितिका संयोजक प्रज्वल ओलीले जानकारी दिएका छन् । यस संस्करणदेखि चार विधामा समान आठजना मनोनयनमा समावेश गरिएको हो । 

यसअघि पाँचजना मनोनयन सार्वजनिक हुने र तीमध्येबाट अवार्डकै दिन विजेता घोषणा गर्ने गरिन्थ्यो । यद्यपि, यस संस्करणबाट अवार्ड आयोजनाको केही दिन अगाडि नै शीर्ष तीनको मनोनयन सार्वजनिक गर्न थालिएको हो । 

तथ्यांकमा वर्ष महिला तीनमा पर्न सफल खेलाडी : 
अनुशा मल्ल (बास्केटबल) 
– माल्दिभ्समा भएको साबा वुमेन्स च्याम्पियनसिपमा रजत 
– साबा वुमेन्स च्याम्पियनसिपमा उत्कृष्ट प्रदर्शन गर्न सफल खेलाडी 
– नेपालले खेलेको तीनमध्ये दुई खेलमा नेपालको तर्फबाट उच्च स्कोर गर्ने खेलाडी 
– नवौँ राष्ट्रिय खेलकुदमा वाग्मती प्रदेशबाट रजत जित्न सफल 

पुष्पा भण्डारी (एथलेटिक्स) 
– बंगबन्धु शेख मुजिब ढाका म्याराथनमा राष्ट्रिय कीतिमानसहित स्वर्ण 
– १६औँ एसियन क्रसकन्ट्री च्याम्पियनसिप महिला टिममा रजत (राजपुरा पछाई र विन्द्राधन्के श्रेष्ठ) 
– नवौं राष्ट्रिय खेलकुद महिला १० हजार मिटरमा कांस्य 
– सहारा हाफ म्याराथन स्वर्ण 
– कान्तिपुर हाफ म्याराथनमा रजत 
– वीर गणेशमान सिंह १० किमी रोड रेसमा रजत 
– मदन भण्डारी स्मृति रोड रेस ५ किमी रोड रेसमा रजत 

राजपुरा पछाई (एथलेटिक्स) 
– १६औँ एसियन क्रसकन्ट्री च्याम्पियनसिप १० किमिमा रजत पदक 
– १६औँ एसियन क्रसकन्ट्री च्याम्पियनसिप महिला टिममा रजत (पुष्पा भण्डारी र विन्द्राधन्के श्रेष्ठ) 
– नवौँ राष्ट्रिय खेलकुद महिला पाँच हजार मिटरमा रजत 
– वीर गणेशमान सिंह र धरान १० किमी रोड रेसमा स्वर्ण 
– कान्तिपुर, पोखरा, लुम्बिनी, इलाम माईपोखरी र प्रधानसेनापति हाफ म्याराथनमा स्वर्ण 
– नेपालगन्ज म्याराथनको पाँच किमी दौडमा स्वर्ण 
– राष्ट्रिय एथलेटिक्समा तीन हजार मिटर दौडमा रजत