काठमाडौं । प्रस्तोता टकर कार्लसनले रुसी राष्ट्रपति भ्लादिमिर पुटिनसँगको अन्तर्वार्ताले अहिले विश्वभर चर्चा पाइरहेको छ ।

बिहीबार राति सार्वजनिक भएको अन्तर्वार्तामा पुटिनले अमेरिकाले युक्रेनलाई हतियार दिन बन्द गर्नुपर्ने बताएका छन् ।

सन् २०२२ को फेब्रुअरी २४ मा युक्रेनमा आक्रमण गरेयता पश्चिमी मिडियामा पुटिनको यो पहिलो अन्तर्वार्ता हो ।

मस्कोमा लिइएको दुई घन्टाको अन्तर्वार्तामा पुटिनले ओलेग द वाइजको नवौँ शताब्दीको शासनदेखि लिएर सन् १३०० को संघर्षसम्मको इतिहासबारे बोलेका छन् ।

अन्तर्वार्तामा उनले ३० मिनेटसम्म लेनिनको विदेश नीतिदेखि रुस, लिथुआनिया, पोल्याण्ड र युक्रेनको इतिहासबारे बोलेका छन् ।

२१औँ शताब्दीमा पुग्दा पुटिनले युक्रेन युद्ध लम्बिनुको आरोप अमेरिका र अन्य पश्चिमी देशलाई लगाएका छन् ।

पुटिनले युक्रेनसँगको शान्ति वार्ता लगभग अन्तिम चरणमा पुगेको तर रूससँग लड्न उसले अमेरिका र अन्य पश्चिमा मुलुकको निर्देशन मानेको बताएका छन् ।

पुटिनले बेलायतका पूर्वप्रधानमन्त्री बोरिस जोनसनलाई पनि यसको दोष लगाएका छन् ।

अन्तर्वार्ताअघि एक भिडियोमा कार्लसनले ‘पुटिनले युक्रेनमा किन आक्रमण गरे वा उनको लक्ष्य के हो’ भन्ने कुरा अमेरिकी नागरिकलाई थाहा नभएको भन्दै अन्तर्वार्ता लिन प्रेरित भएको बताएका थिए ।

पुटिनले अमेरिकाले युक्रेनलाई हतियार पठाउन छोडेमा चाँडै नै युद्ध अन्त्य हुने बताएका छन् ।

अमेरिकालाई रुसको सन्देशका रूपमा पुटिनले भनेका छन्, “अमेरिकाले साँच्चै लडाइँ रोक्न चाहन्छ भने हतियार आपूर्ति बन्द गर्न आवश्यक छ । त्यसपछि युद्ध केही हप्तामै समाप्त हुन्छ ।”

पुटिनले युक्रेनमा आक्रमण गर्नुअघि अमेरिकी राष्ट्रपति जो बाइडेनसँग अन्तिम पटक कुरा भएको बताए ।