काठमाडौं । हमासले इजरायलसँग १३५ दिने युद्धविरामको प्रस्ताव गरेको छ । यो प्रस्तावले गाजामा करिब साढे चार महिनाको लागि शान्ति आउने अपेक्षा गरिएको छ ।

यस अवधिमा हमासले सबै बन्दीहरूलाई मुक्त गर्ने छ । तर, प्रतिक्रियामा इजरायलले गाजा पट्टीबाट आफ्ना सेना फिर्ता लैजानुपर्ने छ ।

नयाँ सम्झौताले युद्धको अन्त्य हुने समेत अपेक्षा गरिएको छ ।

हमासको राजनीतिक ब्युरोका वरिष्ठ सदस्य मुहम्मद नाज्जलले प्रस्तावबारे बताएको अलजजिरालाई उद्धृत गर्दै द गार्जियनले लेखेको छ ।

गत हप्ता कतारी र इजिप्टका मध्यस्थकर्ताबाट हमासले अमेरिका र इजरायलको समर्थन रहेको युद्धविराम सम्झौता प्राप्त गरेको बताइएको छ ।

गत अक्टोबर ७ देखि सुरु भएको युद्ध रोक्न यो अहिलेसम्मकै ठूलो कूटनीतिक पहल ठानिएको छ ।

इजरायलले हमासको सखाप नभएसम्म गाजाबाट आफ्ना सेना फिर्ता नगर्ने बताउँदै आएको छ । इजरायलले यो प्रस्तावबारे कुनै पनि सार्वजनिक प्रतिक्रिया दिइनसकेको रोयटर्सले जनाएको छ ।

रोयटर्सले युद्धविराम प्रस्ताव प्राप्त गरेको जनाउँदै तीन चरणको युद्धविरामको हरेक चरण ४५ दिनको रहने उल्लेख गरेको छ ।

यो क्रममा दुवै पक्षले बन्दीहरू फिर्ता गर्ने, गाजाको पुनर्निर्माण सुरु हुने, इजरायली सेना पूर्ण रूपमा फिर्ता हुने र शव आदानप्रदान हुने बताइएको छ ।

यसबीच अमेरिकी विदेशमन्त्री एन्टोनी ब्लिन्केन रातारात इजरायल पुगेको बताइएको छ ।

यो युद्धविरामले युद्ध अन्त्यको ग्यारेन्टी नगर्ने तर अन्तिम चरणका बन्धक रिहाइ गर्नुअघि युद्ध समाप्त गर्न दुवै पक्ष सहमत हुनुपर्ने जनाइएको छ ।

रोयटर्सबाट ।