काठमाडौं । त्रिभुवन विश्वविद्यालय (त्रिवि) परीक्षा नियन्त्रण कार्यालयको वेबसाइटमा समस्या देखिएको पाँच दिन भएको छ । यही माघ १७ गते टीयूइक्जामडटईडीयूडटएनपी वेबसाइट ‘ह्याक’ भएको थियो । आइतबार (माघ २१)सम्म वेबसाइट बनिसकेको छैन ।

त्रिवि परीक्षा नियन्त्रण कार्यालयका प्रमुख दीपकबहादुर शाहीले आज या भोलि (सोमबार)सम्ममा वेबसाइट बन्ने बताए ।

“पहिला सुविधा मात्रै भयो । अब सुविधा र सुरक्षासहित वेबसाइट सार्वजनिक हुन्छ,” उनले बाह्रखरीसित भने, “डेभलपरहरूले काम गरिरहेका छन् ।”

वेबसाइट ह्याक गरेर एक फेसबुक पेजमा ‘रिडाइरेक्ट’ गर्नुका साथै केही सिस्टममा समेत आक्रमण गरिएको उनले बताए । डाटा भने सबै सुरक्षित रहेको उनको भनाइ छ ।

वेबसाइट कसले ह्याक गरेको र त्यसको कानुनी कारबाहीको पाटोबारे आफूलाई थाहा नभएको आईटी प्रमुख शाहीले बताए ।

“आज या भोलिसम्म वेबसाइट लाइभ हुन्छ भन्ने सूचना छ । ह्याक गर्नेका सन्दर्भमा कारबाही एवं कानुनी प्रक्रिया सम्बन्धित निकायले गर्ला,” उनले भने ।

कैयौँ विद्यार्थीले परीक्षा नियन्त्रण कार्यालयको वेबसाइट ‘डाउन’ हुँदा सूचना हेर्न नपाएको सामाजिक सञ्जालमा गुनासो गरेका छन् । अहिले उक्त वेबसाइट खोल्दा ‘निमार्णको क्रममा रहेको’ लेखिएको मात्र देखिएको छ ।