काठमाडौं । नेपाल प्रहरीले लागुऔषध मुद्दाका फरार अभियुक्त अखिल नेपाल फुटबल संघ (एन्फा)का उपाध्यक्ष दावा लामाको खोजी सुरु गरेको छ । ०६४ जेठ २० गते तत्कालीन पुनरावेदन अदालत पाटनले लामालाई पाँच वर्ष कैद र पाँच हजार रुपैयाँ जरिवाना तोकेको खुलेसँगै प्रहरीले खोजी थालेको हो ।

लागुऔषध खैरो हेरोइनसहित ०६१ सालमा उनी पक्राउ परेका थिए । त्यसयता प्रहरीबाट लुकीछिपी बस्दै आएका लामा एन्फाको उपाध्यक्षमा निर्वाचित भएका थिए ।

गत वर्षको असार ६ गते एन्फाको साधारणसभाबाट अध्यक्ष पंकजविक्रम नेम्वाङको प्यानलमार्फत उनी उपाध्यक्षमा निर्वाचित भएका थिए । प्रहरीले खोजी गरेको चाल पाएपछि लामा हाल फरार छन् ।

उनको खोजी भइरहेको नेपाल प्रहरीका प्रवक्ता एवं डीआईजी भीमप्रसाद ढकालले बाह्रखरीलाई जानकारी दिए ।

लागुऔषधसहित ०६१ मा पक्राउपछि अदालतको फैसला आउँदासम्म लामाले १० महिना दुई दिन हिरासतमा बिताएका थिए । त्यसयता पक्राउ हुनबाट जोगिँदै आएका उनले अझै चार वर्ष एक महिना २८ दिन कैद भुक्तान गर्न बाँकी छ ।