काठमाडौं । सुन तस्करी प्रकरणबारे छानबिन गर्न बनेको जाँचबुझ आयोगले मोरङका चुडामणी उप्रेती ‘गोरे’ को बयान लिएको छ ।

२०७४ माघमा दुबईबाट ल्याइएको ३३ किलो सुन तस्करी र मोरङकै शनम शाक्य हत्या प्रकरणमा गोरे जेल पुगेका थिए । हाल उनीलाई सुन्धारा कारागारभित्र राखिएको छ । उनलाई जाँचबुझ आयोगले माघ ८ मा बयान लिएको हो ।

गोरे समूहले तस्करी गरेर दुबईबाट ल्याएको सुन पुरानो बानेश्वरबाट लुटिएको थियो । सुन लुट्ने समूहमा शाक्य रहेको आशंका गर्दै गोरे समूहले शाक्यको हत्या गरेका थिए ।

गएको साउनमा हङकङबाट ‘ब्रेक सू’मार्फत भएको ६० किलो सुन तस्करी र भेपमार्फत भएको सुन तस्करीबारे जाँचबुझ गर्न सरकारले उच्च अदालत पाटनका पूर्वन्यायाधीश डिल्लीराज आचार्यको नेतृत्वमा असोज १४ मा आयोग गठन गरेको छ ।

हालसम्म आयोगले सुन तस्करीमा जेल पुगेका आरोपीदेखि प्रहरी र अभियोजनकर्तामाथि समेत बयान लिइसकेको छ ।