काठमाडौं । आईसीसी यू–१९ विश्वकपअन्तर्गत सुपर सिक्सको आफ्नो पहिलो खेलमा नेपालले आज बंगलादेशविरुद्ध खेल्दै छ । दक्षिण अफ्रिकाको मनगंग ओभलमा हुने यो खेल नेपाली समयअनुसार दिउँसो १ः४५ बजेदेखि सुरु हुँदै छ । तर, सुपर सिक्सको खेल खेल्नुअगावै नेपाल प्रतियोगिताको सेमिफाइनल पुग्ने समीकरणबाट बाहिरिसकेको छ । आजको खेलपछि नेपालले सुपर सिक्सको दोस्रो खेलमा फेब्रुअरी २ मा भारतसँग खेल्नेछ ।

सुपर सिक्सका खेल नखेल्दै कसरी बाहिरियो नेपाल ?
नेपाल सुपर सिक्सको समूह–१ मा छ । यो समूहमा नेपालसँगै पाकिस्तान, बंगलादेश, न्युजिल्यान्ड, भारत र आयरल्यान्ड छन् । नेपाल, न्युजिल्यान्ड र पाकिस्तान समूह ‘डी’ बाट र भारत, बंगलादेश र आयरल्यान्ड समूह ‘ए’को शीर्ष तीन स्थानमा रहँदै सुपर सिक्समा आएका हुन् । 

आईसीसीको नियमअनुसार सुपर सिक्समा प्रवेश गरेको ६ टिममध्ये एकै समूहका टिमले सुपर सिक्समा प्रतिस्पर्धा गर्न पाउँदैनन् । यसबाहेक दोस्रो समूहबाट एउटै स्थानमा रहँदै सुपर सिक्स आएको टिमसँग पनि अर्को टिमले खेल्नु पर्दैन । यसकारण समूह ‘डी’को तेस्रो स्थानमा रहँदै सुपर सिक्स आएको नेपालले समूह ‘ए’ को तेस्रो स्थानमा रहँदै आएको आयरल्यान्डसँग खेल्न नपर्ने भएको हो ।

आईसीसीको नियमअनुसार यदि समूह चरणमा जित निकालेको कुनै टिम सुपर सिक्समा आएका छन् भने उक्त टिमविरुद्ध जित निकालेको टिमको खातामा दुई अंक रहनेछ । यसकारण सुपर सिक्सअन्तर्गत मंगलबार भएको खेलमा भारत र पाकिस्तानले जित निकालेपछि नेपालको सम्भावना सकिएको हो । भारतले यसअघि समूह चरणमा बंगलादेश र आयरल्यान्डविरुद्ध जित निकालेको थियो । भारतले जित निकालेको दुवै टिम सुपर सिक्समा आएका कारण उसको खातामा चार अंक पहिले नै थियो । 

मंगलबार भएको खेलमा न्युजिल्यान्डविरुद्ध २१४ रनको जित निकाल्दै भारतले ६ अंक जोडेको छ । पाकिस्तानले समूह चरणमा नेपाल र न्युजिल्यान्डविरुद्ध जित निकालेको थियो । यसकारण चार अंक पहिले नै पाएको पाकिस्तानले पनि मंगलबार सुपर सिक्सको खेलमा आयरल्यान्डलाई हराउँदै ६ अंक पुर्यायो । नेपालले सुपर सिक्समा दुई खेल खेल्ने मात्र भएकाले दुवै खेलमा जित निकाले पनि नेपालको चार अंक मात्र हुन्छ । नेपालले समूह अन्तिम खेलमा अफगानिस्तानलाई हराएर समूहमा दुई अंक जोडेको थियो । तर, आईसीसीको नियमअनुसार अफगानिस्तान समूह चरणबाटै बाहिरिएकाले उक्त दुई अंक सुपर सिक्समा गणना हुँदैन ।

यसकारण मंगलबार भारत र पाकिस्तानको जितसँगै नेपालको सेमिफाइनल सम्भावना समाप्त भएको हो ।