काठमाडौं । ड्यानिल मेडभेडेभविरुद्ध दुई सेटले पछि परेको अवस्था उल्ट्याउँदै इटालीका यानिक सिनरले वर्षको पहिलो ग्रान्डस्लाम अस्ट्रेलियन ओपन–२०२४ को उपाधि जितेका छन् ।

आइतबार अस्ट्रेलियाको मेलबर्नस्थित रोड लभेर एरिनामा सम्पन्न रोमाञ्चक फाइनलमा २२ वर्षीय युवा सिनरले मेडभेडेभविरुद्ध ३–२ को सेटमा जित निकाल्दै पहिलोपटक ग्रान्डस्लामको उपाधि जितेका हुन् ।

रोड लभेर एरिनामा मेडभेडभविरुद्ध सिनरले सुरुका दुई सेट ६–३, ६–३ ले गुमाएका थिए । तर, त्यसपछिका तीन सेटमा ६–४, ६–४, ६–३ को उत्कृष्ट पुनरागन जित निकाल्दै सिनर च्याम्पियन बने । मेलबर्नमा यी दुईबीचको फाइनल कुल तीन घण्टा ४४ मिनेटसम्म चलेको थियो ।

“सर्वप्रथम यो उत्कृष्ट खेलका लागि मेड्भेडेबलाई धन्यवाद दिन चाहन्छु । यसअघि मैले हरेकपटक उनीविरुद्ध खेल्दा नयाँ अनुभव लिने मौका पाए । म मेड्भेडेबलाई पनि यो उपाधि जित्नका लागि सुभकामना दिन चाहन्छु,” जितपछि सिनरले भने ।

उनले अगाडि भने, “उनले यो उपाधि जित्न सक्नेछन् भन्ने मेरो विश्वास छ । मसँगै रहेका टिमका सबैलाई धन्यवाद दिन चाहन्छु । हामी हरेक दिन अझ राम्रो गर्ने प्रयास गर्‍यौँ । उहाँ आएर मलाई समर्थन गर्नुहुने सम्पूर्णमा धन्यवाद । घरबाट मलाई हेरिरहनु भएका मेरो परिवार आज यहाँ सँगै हुन् भन्ने मेरो चाहना थियो । मेरो हरेक परिस्थितिमा साथ दिने परिवारलाई पनि धन्यवाद व्यक्त गर्न चाहन्छु ।”

जितसँगै अस्ट्रेलियन ओपनको च्याम्पियन बन्ने सिनर इटालीका पहिलो खेलाडी बने । यस्तै, उनी समग्रमा ग्रान्डस्लामको उपाधि जित्ने दोस्रो इटालीयन खेलाडी बने । सिनरअघि सन् १९७६ मा इटालीका एड्रियानो पानाटाले फ्रेन्च ओपनको उपाधि जितेका थिए ।