विराटनगर । कोसी प्रदेशबाट राष्ट्रियसभा सदस्य निर्वाचनमा साझा उमेदवारमध्ये एकजना पराजित भएको विषयमा सत्ता गठबन्धन दलले गम्भीर ध्यानाकर्षण भएको जनाएको छ । आधिकारिक उमेदवारलाई मत नहाल्ने जनप्रतिनिधिको विषयमा छानबिन गरी अनुशासनको कारबाही गर्ने गठबन्धनले चेतावनी दिएको छ । 

निर्वाचनमा गठबन्धन दलका कृष्ण सिटौलालाई प्रदेशसभा सदस्य तथा पालिका प्रमुख/उपप्रमुखले ‘फ्लोर क्रस’ गरेर मत हालेका थिए । गठबन्धनको साटो एमाले उमेदवारलाई मतदान गर्दा अर्की उमेदवार चम्पा कार्की पराजित बनेकी थिइन् । 

बिहीबार सम्पन्न निर्वाचनमा कांग्रेसका कृष्णप्रसाद सिटौला विजयी भए । तर, माओवादी केन्द्रबाट चम्पादेवी कार्की पराजित भएकी थिइन् । चम्पालाई पराजित गरी एमाले उमेदवार रुम्मिणी कोइराला विजयी भइन् । 

बिहीबार गठबन्धन दलका तर्फबाट जारी प्रेस विज्ञप्तिमा “गठबन्धनको निर्णयविपरीत मतदान गर्ने गठबन्धन दलका गैरजिम्मेवार तथा निकृष्ट जनप्रतिनिधिहरूको सम्बन्धमा यथाशीघ्र छानबिन गरी अनुशासनको दायरामा ल्याउन हामी प्रतिवद्ध छौँ” भनिएको छ ।

सम्बद्ध चार दलले निर्वाचन परिणामबाट एकजना उमेदवारलाई मात्र विजय गराउन सफल भएको जनाएका छन् । 

“गठबन्धनको अर्का उमेदवार चम्पादेवी कार्कीको पराजयप्रति गठबन्धन दलको गम्भीर ध्यानाकर्षण भएको छ । आगामी दिनमा यसको गम्भीर समीक्षा गर्दै गठबन्धन संस्कृति, लोकतान्त्रिक गणतन्त्रात्मक संविधानबाट प्रदत्त अधिकारहरूलाई अझ मजबुत र कार्यान्वयनका लागि हामी दृढ़ संकल्पित छौँ,” विज्ञप्तिमा भनिएको छ । 

गठबन्धन दल नेपाली कांग्रेस संसदीय दल कोसीका नेता उद्धव थापा, नेकपा (माओवादी केन्द्र) संसदीय दलका नेता इन्द्र आङ्वो, नेकपा (एकीकृत समाजवादी) संसदीय दलका नेता राजेन्द्र राई र जसपा कोसी प्रदेश संसदीय दलका नेता निर्मला लिम्बूले विज्ञप्ति प्रकाशित गरेका हुन् ।