काठमाडौं । वर्षको पहिलो ग्रान्डस्लाम अस्ट्रेलियन ओपनको क्वार्टरफाइनल समीकरण पूरा भएको छ । सोमबार पुरुष एकलतर्फ र महिला एकलतर्फका समान चार खेलसँगै प्रतियोगितामा एकलतर्फको सेमिफाइनल समीकरण पूरा भएको हो । 

पुरुषतर्फ सोमबार जित निकाल्दै कार्लोस अल्कारेज, एलेक्सान्डर जेभरेभ, ड्यानियल मेडभेडेभ र हुबर्ट हुर्काजले अन्तिम–८ मा स्थान पक्का गरे ।

विश्व वरीयताको दोस्रो स्थानका अल्कारेजले सर्वियाका मिओमिर केक्मानोभिचलाई ६–४, ६–४, ६–० को सोझो सेटमा पराजित गरे । स्पेनिस स्टार अल्कारेजले अब सेमिफाइनल प्रवेशका लागि जर्मनीका जेभरेभसँग खेल्ने छन् ।

सोमबार नै भएको खेलमा जेभरेभले ब्रिटेनका क्यामेरोन नोरीलाई ७–६, ३–६, ६–३, ४–६, ७–६ (१०–३) ले हराउँदै क्वार्टरफाइनल यात्रा तय गरे । 

यस्तै, तेस्रो स्थानमा मेडभेडेभले पोर्चुगलका नुनो बोर्गेसलाई ६–३, ७–४ (७–४), ५–७, ६–१ ले पराजित गर्दै अन्तिम–८ को यात्रा तय गरे । मेडभेडेभले अब सेमिफाइनल प्रवेशका लागि पोल्यान्डका हुबर्ट हुर्काजविरुद्ध खेल्ने छन् ।

आजै भएको खेलमा नवौं वरीयताका हुर्काजले फ्रान्सका अर्थर काजाउक्सलाई ७–६ (८–६), ७–६ (७–३), ६–४ को सेटमा पराजित गर्दै क्वार्टरफाइनलमा स्थान बनाएका थिए । 

यसअघि आइतबार भएको खेलमा जित निकाल्दै साविक विजेता नोभाक जोकोभिच, टेलर फ्रिट्ज, जानिक सिनर र एन्डी रुभलेभले अन्तिम–८ को यात्रा तय गरेका थिए । 

महिलातर्फ सोमबार भएको खेलमा जित निकाल्दै चीनकी क्विनवेन झेङ, एन्ना कालिन्सकाया, लिन्डा निस्कोभा र डयाना यास्ट्रेमस्काले क्वार्टरफाइनलमा स्थान बनाएका छन् ।