काठमाडौं । हिमाली तथा उच्च पहाडी भू–भागमा आज हिमपातको सम्भावना रहेको छ । पश्चिमी वायुको आंशिक प्रभाव रहँदा हिमपातको सम्भावना रहेको हो । आज वर्षा भने हुने छैन । 
 
जल तथा मौसम विज्ञान विभागका अनुसार बिहान कोसी, वाग्मती र गण्डकी प्रदेशको पहाडी भू–भागमा आंशिकदेखि साधारणतया बदली रहेको छ । बाँकी भू–भागमा आंशिक बदलीदेखि मुख्यतया सफा रहेको छ । तराईका अधिकांश भू–भागमा हुस्सु र कुहिरो लागेको छ ।

तराईका केही स्थानमा सवारी साधन चलाउन नसक्नेगरी बाक्लो हुस्सु र कुहिरो लागेको छ । “विराटनगरमा बिहान ६ बजे भिजिविलिटी सय मिटर छ । घोराहीमा दुई सय मिटर छ,” मौसमविद् सञ्जिव अधिकारी बाह्रखरीसँग भन्छन्, “विराटनगर, घोराहीजस्ता न्यून भिजिविलिटी भएका स्थानमा सवारी साधन चलाउन हुँदैन/सकिँदैन ।”

धनगढीमा एक किलोमिटर र जनकपुरमा ८०० मिटर भिजिविलिटी छ । यो भिजिविलिटीले हवाई उडान तथा अवतरणमा भने समस्या नहुने उनले स्पष्ट पारे । अन्य स्थानमा भने चार/पाँच किलोमिटर भिजिविलिटी रहेको उनको भनाइ छ । 

काठमाडौंमा बिहान पौने ६ बजेको न्यूनतम तापक्रम ५.४ डिग्री सेल्सियस छ । दिउँसो बढेर १७ देखि १९ डिग्री सेल्सियससम्म पुग्ने मौसमविद् अधिकारीले जानकारी दिए । 

उनले दिउँसो कोसी, वाग्मती र गण्डकी प्रदेशको पहाडी भू–भागमा आंशिकदेखि साधारणतया बदली रहने बताए । बाँकी भू–भागमा आंशिक बदलीदेखि मौसम मुख्यतया सफा रहनेछ । 

कोसी, वाग्मती र गण्डकी प्रदेशका उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ ।

पहाडी भू–भागमा राति आंशिक बदली रहनेछ । बाँकी भू–भागमा मौसम मुख्यतया सफा रहनेछ ।

कोसी र गण्डकी प्रदेशका उच्च पहाडी तथा हिमाली भू–भागका केही स्थानमा हल्का हिमपातको सम्भावना रहेको विभागले जनाएको छ । 

तराईका अधिकांश स्थानमा हुस्सु र कुहिरो लागेकाले दैनिक जनजीवन, स्वास्थ्य, सडक तथा हवाई यातायातमा प्रभाव पर्नसक्ने भन्दै सतर्क रहन विभागको आग्रह छ । चिसोबाट बच्न समेत आवश्यक उपायहरू तथा सतर्कता अपनाउन विभागले भनेको छ ।