काठमाडौं । कीर्तिमानी खेलमा साविक उपविजेता एलिना रेबाकिनाविरुद्ध २–१ को रोमाञ्चक सेटमा जित निकाल्दै एन्ना ब्लिन्कोभा वर्षको पहिलो ग्रान्डस्लाम अस्ट्रेलियन ओपनको तेस्रो चरणमा प्रवेश गरेकी छन् । 

बिहीबार रोड लभेर एरिनामा सम्पन्न खेलमा पहिलो सेट ब्लिन्कोभाले ६–४ ले जितेकी थिइन् । दोस्रो सेट ६–४ ले जित्दै रेबाकिनाले खेलमा पुनरागमन गरेकी थिइन् । दुई सेटमा दुवै खेलाडीले समान एक सेट जितेपछि खेल तेस्रो सेटमा पुगेको थियो । 

जहाँ कीर्तिमानी टाइब्रेकरमा विश्व वरीयताको तेस्रो स्थानकी रेबाकिनालाई ७–६ (२२–२०) ले हराउँदै ब्लिन्कोभाले तेस्रो चरणका स्थान पक्का गरेकी हुन् । यी दुईबीचको तेस्रो सेट ९३ मिनेटसम्म चलेको थियो । अस्ट्रेलियन ओपनको इतिहासमा यो अहिलेसम्मकै सबैभन्दा लामो टाइब्रेकर हो । 

यसअघि सन् २००७ को संस्करणमा जो विलफ्रिड सोङ्गा र एन्डी रोडिकबीचको खेलको टाइब्रेकर २०–१८ सम्म चलेको थियो । उक्त टाइब्रेकर सोङ्गाले जितेका थिए । ब्लिन्कोभा र रेबाकिनाबीचको खेल कुल दुई घण्टा ४६ मिनेट चलेको थियो ।

ब्लिन्कोभाले अब चौथो चरण प्रवेशका लागि इटालीकी ज्यास्मिन पाओलिनीसँग खेल्नेछिन् । पाओलिनीले जर्मनीकी तात्जाना मारियालाई ६–२ ६–३ को सोझो सेटमा हराउँदै तेस्रो चरणमा स्थान बनाएकी हुन् । 

बिहीबार नै भएको खेल जित्दै विश्व नम्बर एक इगा स्वायटेक र एलिना स्भितोलिनाले तेस्रो चरण यात्रा तय गरे । ब्रिटिस स्टार इम्मा राडुकानु र अमेरिकी स्टार जेसिका पेगुलाले भने दोस्रो चरण पार गर्न सकेनन् । पोल्यान्डकी २२ वर्षीय युवा खेलाडी स्वायटेकले अमेरिकाकी ड्यानियल कोलन्सलाई ६–४ ३–६ ६–४ को सेटमा निराश बनाइन् । 

स्वायटेकले अब चौथो चरण प्रवेशका लागि अमेरिकाकै म्याकार्थी कस्लेरसँग खेल्नेछिन् । युक्रेनकी स्भितोलिनाले तेस्रो चरण प्रवेश गर्नेक्रममा बुल्गेरियाकी भिक्टोरिया टोमोभालाई ६–१ ६–३ को सोझो सेटमा पराजित गरिन् । स्भितोलिनाले अब चौथो चरण प्रवेशका लागि स्वीट्जरल्यान्डकी भिक्टोरिजा गोलुबिकसँग खेल्नेछिन् ।

ब्रिटिस स्टार राडुकानु भने तेस्रो चरणमा चीनकी याफन वाङसँग ६–४ ४–६ ६–४ को सेटमा पराजित भइन् । २१ वर्षीय राडुकानु एक पटक ग्रान्डस्लाम जिते पनि अस्ट्रेलियन ओपनमा भने दोस्रो चरण पार गर्न सकेकी छैनन् । विश्व वरीयताकी पाँचौ स्थानमा आसिन पेगुला भने फ्रान्सकी क्लारा बुरेलसँग ६–४ ६–२ को सोझो सेटमा पराजित भइन् ।