काठमाडौं । रोमाञ्चक खेलमा घरेलु खेलाडी एलेक्सेई पोपीरिनलाई ३–१ को सेटमा हराउँदै साविक विजेता नोभाक जोकोभिच वर्षको पहिलो ग्रान्डस्लाम अस्ट्रेलियन ओपनको तेस्रो चरणमा प्रवेश गरेका छन् ।

बुधबार रोड लभेर एरिनामा सम्पन्न खेलमा १० पटकको च्याम्पियन जोकोभिचले पहिलो सेट ६–३ ले जितेका थिए । तर, यसपछिको सेट ६–४ ले जित्दै पोपीरिनले खेल बराबरीमा ल्याएका थिए ।

चर्को प्रतिस्पर्धा चलेको तेस्रो सेट जोकोभिचले ७–६ (७–४) ले जित्दै खेलमा २–१ को अग्रता बनाएका थिए । यस्तै, चौथो सेट ६–३ ले जित्दै विश्व नम्बर एक जोकोभिचले तेस्रो चरणमा स्थान बनाएका हुन् । यी दुईबीचको खेल कुल तीन घण्टा ११ मिनेटसम्म चलेको थियो । 

जोकोभिचले अब चौथो चरण प्रवेशका लागि अर्जेन्टिनाका टोसम मार्टिन एचेभेरीसँग खेल्ने छन् । एचेभेरीले फ्रान्सका गिएल मोन्फिल्सलाई ६–४, ६–४, ६–४ को सोझो सेटमा हराउँदै तेस्रो चरणको यात्रा तय गरेका हुन् ।

बुधबार नै भएको खेलबाट जानिक सिनर, स्टेफानोस सित्सिपास र टेलर फ्रिट्जले पनि आ–आफ्नो खेलमा जित निकाल्दै तेस्रो चरणमा स्थान पक्का गरे ।

चौथो स्थानका सिनरले नेदरल्यान्ड्सका जेस्पेर डे जोङलाई ६–२, ६–२, ६–२ को सहज जित निकाले । इटालियन स्टार सिनरले अब तेस्रो चरणमा सेबास्टियन बाइजसँग खेल्ने छन् । बाइजले कोलम्बियाका ड्यानियल एलाही गलानलाई ३–१ को सेटमा हराउँदै तेस्रो चरणमा स्थान बनाएका हुन् ।

ग्रिसका सित्सिपासले अस्ट्रेलियाका जोर्डन थप्सनलाई ३–१ को सेटमा हराए । सातौँ स्थानका सित्सिपासले पहिलो सेट गुमाए पनि त्यसपछि लगाता तीन सेट जितेका थिए । पहिलो सेट ४–६ ले गुमाए पनि सित्सिपासले ७–६ (८–६), ६–२, ७–६ (७–४) ले जिते ।

सित्सिपासले अब चौथो चरण प्रवेशका लागि फ्रान्सका लुका भान आचसँग खेल्ने छन् । भान आचले दोस्रो चरणमा इटालीका लोरेन्जो मुसेटीलाई ३–२ को प्रतिस्पर्धात्मक सेटमा हराएका थिए । 

१२औँ वरीयताका टेलर फ्रिट्जले तेस्रो चरण प्रवेश गर्ने क्रममा फ्रान्सका ह्युगो गास्टोनलाई सोझो सेटमा पराजित गरे । उनले गास्टोनलाई ६–०, ६–३, ६–२ ले पराजित गरे ।

फ्रिट्जले तेस्रो चरणमा हंगेरीका फाबियन मारोज्सनसँग खेल्ने छन् ।

महिलातर्फ बुधबार सम्पन्न खेलमा साविक विजेता आर्यना साबालेन्का र कोको गौफ तेस्रो चरणमा प्रवेश गरे ।

साबालेन्काले चेक गणतन्त्रकी ब्रान्डा फ्रुभिर्टोभालाई सोझो सेटमा हराइन् । वरीयताको दोस्रो स्थानकी साबालेन्काले फ्रुभिर्टोभाविरुद्ध ६–३, ६–२ को जित निकालिन् । साबालेन्काले अब चौथो चरण प्रवेशका लागि युक्रेनकी लेसिया सुरेन्कोसँग खेल्ने छिन् । 

३३औँ वरीयताकी सुरेन्कोले स्पेनकी रेबेका कासारोभालाई सोझो सेटमा हराउँदै तेस्रो चरणमा स्थान बनाएकी हुन् ।

अमेरिकी स्टार कोको गौफले तेस्रो चरण प्रवेश गर्ने क्रममा आफ्नै देशकी क्यारोलिन डोलेहाइडलाई सोझो सेटमा हराइन् । चौथो वरीयताकी गौफले डोलेहाइडविरुद्ध ७–६ (७–२), ६–२ को जित निकालिन् ।

गौफले अब चौथो चरण प्रवेशका लागि आफ्नै देशकी एलिसिया पार्क्ससँग खेल्ने छिन् ।