![सूर्य तामाङको घातक बलिङप्रेरित आर्मीविरुद्ध वाग्मतीको जित](https://12khari.top/uploads/posts/ba-1705494681.jpg)
काठमाडौं । सूर्य तामाङको घातक बलिङप्रेरित वाग्मती प्रदेशले विभागीय टिम त्रिभुवन आर्मी क्लबविरुद्ध तीन विकेटको जित निकालेको छ ।
बुधबार मूलपानीस्थित मूलपानी क्रिकेट मैदानमा सम्पन्न खेलमा वाग्मतीका सूर्यले पाँच विकेट लिँदा टस जितेर ब्याटिङमा आएको आर्मी २७.१ ओभरमा ९७ रनमै समेटिएको थियो । ९८ रनको लक्ष्यसहित मैदान ओर्लिएको वाग्मतीले २२.१ ओभरमा सात विकेट गुमाएर १०३ रन बनाउँदै जित निकाल्यो ।
वाग्मतीको जितमा अशोक पौडेल र प्रतिश जिसीले समान २१ रन बनाए । इशान पाण्डे र रविन जोशीले समान १२ रन थप्दा विपिन आचार्यले १० रन बनाए ।
आर्मीका सोमपाल कामीले तीन विकेट लिए । साहब आलम र जितेन्द्र मुखियाले दुई–दुई विकेट लिए ।
त्यसअघि आर्मीका कप्तान विनोद भण्डारीले २८ रन बनाए । भीम सार्कीले १८ र विवेक यादवले ११ रन थपे । यसबाहेक, विभागीय टिमका अन्य ब्याटरले दोहोरो अंकमा रन जोड्न सकेनन् ।
आर्मीलाई सस्तैमा समेट्न वाग्मतीका सूर्यले पाँच विकेट लिए । घातक बलिङ गरेका सूर्यले नौ ओभरमा दुई मेडन राख्दै २६ रनमात्र खर्चिए । सूर्यले यसअघि मंगलबार मधेस प्रदेशविरुद्ध ६ विकेट लिएका थिए ।
आर्मीविरुद्ध सूर्यबाहेक, प्रतिश जिसी र रिजन ढकालले समान दुई विकेट लिए । कृजन गुरुङले एक विकेट हात पारे ।
जितसँगै चार खेलबाट चार अंक जोडेको वाग्मती तालिकाको चौथो स्थानमा उक्लिएको छ । दुई खेलबाट दुई अंक जोडेको आर्मी तालिकको छैटौँ स्थानमा छ ।
बुधबार नै भएको अर्को खेलमा कर्णालीले लुम्बिनी प्रदेशविरुद्ध ६० रनको सहज जित निकालेको छ । भैरहवास्थित सिद्धार्थ क्रिकेट मैदानमा सम्पन्न खेलमा कर्णालीले प्रस्तुत गरेको १८५ रनको लक्ष्य पछ्याउने क्रममा लुम्बिनीले ४१.२ ओभरमा सबै विकेट गुमाएर १२४ रनमात्र जोड्न सक्यो ।
जितसँगै तीन खेलबाट चार अंक जोडेको कर्णाली तालिकाको पाँचौँ स्थानमा उक्लिएको छ । समान खेलबाट दुई अंक जोडेको लुम्बिनी तालिकाको आठौँ स्थानमा छ ।