काठमाडौं । अमेरिकी राष्ट्रपति जो बाइडेनले ताइवानको स्वतन्त्रतालाई समर्थन नगर्ने बताएका छन् । ताइवानको निर्वाचनमा स्वतन्त्रतावादी नेता राष्ट्रपतिमा निर्वाचित भएपछि बाइडेनले यस्तो टिप्पणी गरेका हुन् ।

शनिबार विलियम लाइ ताइवानको राष्ट्रपतिमा निर्वाचित भएका थिए । उनी सत्तारूढ डेमोर्क्याटिक प्रोग्रेसिभ पार्टी (डीपीपी)का नेता हुन् । उनको जितसँगै डीपीपी ताइवानमा लगातार तेस्रो कार्यालयका निम्ति सत्तामा पुगेको हो ।

ताइवानको चुनावी नतिजाबारे प्रतिक्रिया दिँदै बाइडेनले शनिबार भने, “हामी (ताइवानको) स्वतन्त्रतालाई समर्थन गर्दैनौँ...।”

अमेरिकाले सन् १९७९ मा ताइवानसँगको सम्बन्ध अन्त्य गर्दै चीनसँग कूटनीतिक सम्बन्ध स्थापना गरेको थियो ।

अमेरिकाले ताइवानलाई स्वतन्त्र मुलुकका रूपमा समर्थन गर्दैन । तर, अमेरिकाले चीनविरुद्ध अडिग रहन समर्थन र ताइवानलाई रणनीतिक एवं सैन्य सहयोग उपलब्ध गराउँदै आएको छ ।

उता, बेइजिङले ताइवानसँगको पुनर्मिलनका निम्ति सैन्य बल समेत प्रयोग गर्ने जनाइसकेको छ ।

बाइडेनले यसअघि चीनले ताइवानमाथि आक्रमण गरे रक्षा गर्न अमेरिका अघि सर्ने बताएका थिए । तर, शनिबार उनले बेइजिङलाई आश्वस्त पार्ने किसिमको टिप्पणी गरेका हुन् ।

लाइ राष्ट्रपतिमा विजयी भएलगत्तै अमेरिकी विदेशमन्त्री एन्टोनी ब्लिन्केनले बधाई दिएका थिए । प्रतिक्रियास्वरूप चीनले अमेरिकाले गल्ती गरेको टिप्पणी गरेको छ ।

सन् २०१६ मा तत्कालीन राष्ट्रपति डोनाल्ड ट्रम्पले ताइवानकी राष्ट्रपति साई इङ वेनसँग फोनवार्ता गरेका थिए ।

१९७९ मा तत्कालीन अमेरिकी राष्ट्रपति जिम्मी कार्टरले ताइवानसित अन्त्य गर्दै चीनलाई कूटनीतिक मान्यता दिएका थिए । त्यसयता ताइवानका राष्ट्रपतिसँग कुरा गर्ने ट्रम्प पहिलो अमेरिकी राष्ट्रपति थिए । चीनले त्यसबारे कडा विरोध गरेको थियो । रोयटर्सबाट ।