काठमाडौं । ताइवानको राष्ट्रपतिमा सार्वभौमसत्तावादी विलियम लाइ निर्वाचित भएका छन् ।

ताइवानको स्वतन्त्रताको पक्षमा रहेको लाइ निर्वाचित भएसँगै चीनबाट अलग हुने प्रयासमा झनै बल मिलेको छ ।

निर्वाचनको नतिजाले बेइजिङ रुस्ट भएको र ‘ताइवान चीनको हिस्सा हो’ भन्दै विज्ञप्ति जारी गरेको बीबीसीले उल्लेख गरेको छ ।

बेइजिङले ताइवानलाई शान्तिपूर्ण तरिकाले चीनमा ल्याउने र आवश्यक परे बल समेत प्रयोग गर्ने भन्दै आएको छ ।

ताइवानको यो ऐतिहासिक चुनावलाई ‘युद्ध र शान्ति’बीचको निर्वाचनका रूपमा हेरिएको छ ।

ताइवानलाई स्वतन्त्र देश दाबी गर्ने डेमोक्रेटिक प्रोग्रेसिभ पार्टी (डीपीपी) आठ वर्षदेखि सत्तामा छ ।

डीपीपीकै लाइले निर्वाचन जितेसँगै पार्टी लगातार तेस्रो कार्यकालका लागि शासन गर्ने भएको हो ।

राष्ट्रपति निर्वाचित भएपछि उनले ‘देश सही बाटोमा अघि बढ्ने र दायाँबायाँ वा पछाडि नफर्कने ’टिप्पणी गरेका छन् ।

लाइले निर्वाचनमा ४० प्रतिशत मत पाएका छन् । उनका प्रमुख विपक्षी उमेदवार कुओमिन्ताङ (केएमटी) पार्टीका हु यु–इ थिए ।

ताइवानमा सन् २००० देखि चीन समर्थित मानिने केएमटी र डीपीपीबीच प्रतिस्पर्धा छ ।