काठमाडौं । सत्तासाझेदार दल नेकपा (एकीकृत समाजवादी)का तर्फबाट राष्ट्रियसभा सदस्य उमेदवारको टुंगो लगाउने जिम्मा पार्टी अध्यक्ष माधवकुमार नेपालकासहितका तीन नेतालाई दिइएको छ ।

आइतबार बसेको सचिवालय बैठकपछि उपमहासचिव एवं प्रचार विभाग प्रमुख जगन्नाथ खतिवडाले उमेदवारको टुंगो लगाउने जिम्मेवारी अध्यक्ष नेपालसँगै उपाध्यक्ष राजेन्द्र पाण्डे र महासचिव घनश्याम भुसललाई दिइएको बताए ।

सत्ता गठबन्धनमा आबद्ध दलबीच क्लष्टरको टुंगो लाग्न बाँकी रहेकाले उमेदवारको नाम छान्न नसकिएको उनको भनाइ छ ।

“क्लष्टरका कारण हामी अड्किएका छौँ,” उनले भने, “गठबन्धनका बीचमा क्लष्टरका विषयमा छलफलपछि साँझ नाम सार्वजनिक गर्छौँ ।”

आउँदो माघ ११ गते राष्ट्रियसभा सदस्यको निर्वाचन हुँदै छ । त्यसका निम्ति सोमबार (भोलि) भोलि उमेदवारको मनोनयनपत्र दर्ता गर्ने कार्यक्रम छ ।

गठबन्धनमा आबद्ध दलबीच राष्ट्रियसभामा रिक्त हुन लागेका सिटमा भागबन्डा गरिएको छ । भागबन्डाअनुसार नेपाली कांग्रेसले १०, माओवादी केन्द्रले ६, एकीकृत समाजवादीले दुई र जनता समाजवादी पार्टी (जसपा)ले एक सिट पाउने उनीहरूबीच सहमति भएको छ ।