काठमाडौं । नेपालका प्रथम राष्ट्रपति डा. रामवरण यादवले वर्तमान सरकारका काम–कारबाहीप्रति असन्तुष्टि व्यक्त गरेका छन् । शनिबार काठमाडौंमा ‘बिपी वाद’ नामक पुस्तकको लोकार्पण गर्दै उनले असन्तुष्टि व्यक्त गरेका हुन् ।

उनले अहिले सरकार र नेपाली कांग्रेससहितका पार्टीहरूले राम्रो काम गर्न नसकेको जिकिर गरे । देशमा शिक्षा, स्वास्थ्य, कृषिको अवस्था दयनीय भएको उनले बताए ।

“निश्चय नै अहिलेको सरकारले, अहिलेको नेपाली कांग्रेस वा अरू पार्टीहरूले राम्रो गरेनन्,” उनले भने, “राम्रो गर्नुपर्ने त्यो कुरा सही हो । गर्न सकिरहेका छैनन् ।”

दैनिक हजारौँ मानिस विदेश गइरहेको भन्दै उनले गुनासो गरे । उनले देश निर्माणका निम्ति कसैले पनि अब पछि फर्किएर हेर्ने छुट र समय नरहेको बताए । सबै मिलेर देश, जनता र सार्वभौमसत्ताको अस्तित्व जोगाउनुपर्नेमा उनले जोड दिए ।

“हामीले पछि फर्किएर हेर्ने समय छैन । हामी बहुतै गम्भीर भएर नेपालको अस्तित्व जोगाउनुपर्छ,” उनले भने, “यो देश, राष्ट्रको अस्तित्व कायम रहोस् भनेर काम गर्नुपर्छ । आजको देशको अर्थतन्त्र कसरी मजबुत हुन्छ, त्यसमा लागौँ ।” न्युज एजेन्सी नेपाल