काठमाडौं । बीपी संग्राहलयका अध्यक्ष परशुराम पोखरेलले नेपाली कांग्रेसले आयोजना गरेको राष्ट्रिय मेलमिलाप दिवसको कार्यक्रमप्रति असन्तुष्टि जनाएका छन् । 

नेपाली कांग्रेसले कार्यक्रममा बोलाउँदा संसद्मा रहेका दलहरूलाई विभेद गरेकोमा पोखरेलले विमति राखेका हुन् । सामाजिक संजालबाट विमति सार्वजनिक गरेका पोखरेलले राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देनलाई पत्र पठाएको बताएका छन् । 

“मैले उहाँहरूलाई कांग्रेसले राष्ट्रिय मेलमिलाप दिवसको कार्यक्रममा नबोलाएर अपमान भयो भनेर पत्र लेखेको छु,” पोखरेलले बाह्रखरीसँग भने, “यो कांग्रेससले गरेको बीपीको राष्ट्रिय मेलमिलाप नीति र आफ्नै सिद्धान्त विपरीतको काम हो ।” 

उनले बीपीले आफूलाई फाँसी दिन्छु भन्ने मोहन शमशेरदेखि मृत्युदण्डको सजायका लागि तयार भएका राजासम्म हात मिलाएको भन्दै अहिले कांग्रेसले त्यो संस्कार बोक्न नसकेको बताए । 

“अहिले लोकतान्त्रिक गणतन्त्र संस्थागत गर्न र राष्ट्रियता बलियो बनाउन संसद्मा रहेका रास्वपा र राप्रपालाई शक्तिकै रूपमा मान्नुपर्छ । उनीहरूलाई बीपीको ४८औँ राष्ट्रिय मेलमिलाप दिवसमा आयोजना गरेको कार्यक्रममा नबोलाउनु र सत्ता गठबन्धनबाहेक दोस्रो ठूलो दललाई मात्र बोलाइनु कांग्रेसको सिद्धान्त र बीपीको राष्ट्रिय मेलमिलाप नीति विपरीत छ,” पोखरेलले भने, “केही संकुचित सोच भएका र वर्णसंकरको हालीमुहाली भएकाले नेपाली कांग्रेसले आफ्नो सिद्धान्तसँगै बीपीलाई छोड्ने काम भएको छ ।”