काठमाडौं । अस्ट्रेलियाको ब्रिसबेनमा टेनिस चलिरहँदा विषालु सर्प देखिएपछि खेल करिब ४० मिनेट रोकिएको छ ।

ब्रिसबेनमा जारी ब्रिसबेन अन्तर्राष्ट्रिय छनोट प्रतियोगिताका दौरान डोमिनिक थिएम र जेम्स म्याकाबबीचको खेल चलिरहँदा कोर्टमा सर्प देखिएको हो । त्यसपछि खेल प्रभावित बन्यो ।

यूएस ओपन पूर्वच्याम्पियन समेत रहेका थिएम सर्प देखिँदा म्याकाबसँग एक सेटले पछाडि थिए ।

“मलाई पशुपक्षीहरू निकै मन पर्छ, विशेष गरी विदेशी,” खेलपछि थिएमले भने, “उनीहरूले मलाई सर्प निकै विषालु र बल बोक्ने बालबालिकाहरू नजिक रहेको बताए । यसले पनि अवस्था निकै खतरनाक रहेको देखाउँछ । यो त्यस्तो घटनामध्येमा पर्छ, जुन मेरो जीवनमा हालसम्म भएको थिएन । म यसलाई कहिल्यै भुल्ने छैन ।”

करिब ४० मिनेट अवरुद्ध बनेको खेल थिएमले २–६, ७–६ (७–४) र ६–४ ले आफ्नो पक्षमा पारेका थिए । जितसँगै थिएम छनोटको अन्तिम चरणमा प्रवेश गरेका छन् ।