काठमाडौं । नेपाली कांग्रेसका सांसद चन्द्र भण्डारीले सबै शिक्षकहरूको एउटै दरबन्दी बनाउनुपर्ने बताएका छन् । प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको आइतबारको बैठकमा उनले यस्तो बताएका हुन् ।

उनले शिक्षकहरूले समयको मागानुसार विद्यार्थीलाई शिक्षा दिन सक्छन्/सक्दैनन् भन्ने अहिलेको चुनौती रहेको उल्लेख गरे । त्यसबारे पनि सचेत हुनुपर्ने आवश्यकता रहेको उनले बताए ।

उनले शिक्षकहरूले निजामती कर्मचारीसरहको सेवा सुविधा माग्नु जायज रहेको उल्लेख गरे । गुणात्मक शिक्षा दिन शिक्षकहरू अभिभावक, विद्यार्थी, पाठ्यक्रम र परिणामसँग जोडिनुपर्नेमा उनले जोड दिए । विद्यार्थीलाई उसको व्यवहार र क्रियाकलापका आधारमा पनि मूल्यांकन गर्नुपर्ने उनले बताए ।

“शिक्षकहरूको एउटै दरबन्दी बनाउनुपर्छ । योभन्दा बाहिर जानु हुँदैन । अर्कोतिर, हामीलाई चुनौती छ, समयानुसार हामी अपडेट त हुन सकेनौँ, तर वर्तमान शिक्षकले समयको मागानुसार विद्यार्थीहरूलाई अगाडि बढाउन सक्छ कि सक्दैन भन्ने चुनौती छ,” उनले भने, “त्यसका निम्ति हामी सम्बन्धित निकायसँग नै कुरा गरेर यसको समाधान गर्नुपर्छ । किनभने, नयाँ आउने युवाहरूलाई पनि हामीले रोक्नु हुँदैन । पुराना शिक्षकहरूलाई पनि हामीले असन्तुष्ट बनाउनु हुँदैन । त्रिभुवन विश्वविद्यालयको प्राध्यापकलाई पनि हामीले कुनै सुविधा दिएका छैनौँ । नेपाल सरकारको अधिकृतको गाडी हुन्छ । मोटरसाइकल हुन्छ । तर, उसको केही हुँदैन । जसले जन्मायो उसैको केही हुँदैन । भनेपछि उनीहरूले हामीलाई नेपाल सरकारका कर्मचारीसरह मान्यता देऊ भन्ने कुरा जायज होइन भन्ने लाग्दैन । जायज नै हो । शिक्षकहरू अभिभावकसित, विद्यार्थीसित, पाठ्यक्रमसित, रिजल्टसित जोडिनुपर्छ । तब मात्र शिक्षाले पूर्णता प्राप्त गर्न सक्छ ।”

उनले नेपालको अवस्थितिअनुरूपको शिक्षा विद्यार्थीहरूलाई दिनुपर्नेमा जोड दिए ।