काठमाडौं । सुनसरीको इनरुवामा प्रदेश प्रहरी अस्पताल उद्घाटन गर्ने गरी थालिएको तयारी बिथोल्ने काम भएको भन्दै जिल्लास्थित राजनीतिक दलहरूले भर्त्सना गरेका छन् । नेपाली कांग्रेसको पार्टी कार्यालय इनरुवामा बसेको सर्वदलीय बैठकबाट सञ्चालन तयारीमा रहेको कोसी प्रदेश प्रहरी अस्पताल अविलम्ब उद्घाटनको माग गरिएको छ ।
सुनसरीका दलीय अगुवाले राजनीतिक आडमा अस्पताललाई इनरुवाबाट हटाउन खोजिएको भन्दै आपत्ति जनाएका छन् । अस्पतालका विषयमा विवाद सिर्जना गराउने काम गरिएको भन्दै उनीहरूले आफूहरू सडक संघर्षमा उत्रन समेत तयार रहेको जनाएका छन् ।
सर्वदलीय बैठकको नेतृत्व गरेको कांग्रेस सुनसरीका सभापति केदार भण्डारीले प्रहरीले नै इनरुवा रोजेको अस्पताल जबरजस्ती अन्यत्र लैजान खोजिए आन्दोलनमा उत्रने बताए । उनले सिर्जित घटनाक्रमलाई केन्द्रीय तहबाटै निष्पक्ष छानबिन टोली गठन गरी सुल्झाइनुपर्ने माग गरे ।
यता, जिल्ला समन्वय समिति सुनसरीका सभापति राजन मेहताले प्रहरीको प्राविधिक टोलीले उपयुक्त ठहर गरी सञ्चालनका निम्ति स्रोत–साधन जुटाइसकेको अवस्थामा अस्पताल उद्घाटन हुन नदिनु दुःखद भएको प्रतिक्रिया दिए ।
लामो समयदेखि प्रदेश प्रहरी अस्पतालले जग्गासहितका पूर्वाधार खोजिरहेको अवस्थामा आफूले समितिबाट पास गराएर दुई बिघा तीन कट्ठा जग्गासहित ४० कोठे भवन संरचना उपलब्ध गराएको उनले बताए ।
मेहताले प्रहरी अस्पतालका निम्ति आवश्यक संरचना बेलबारी र इनरुवामध्ये कुन उपयुक्त भन्नेबारेमा निष्पक्ष छानबिन समिति गठन गरेर अनुगमनपश्चात् टुंग्याइनुपर्नेमा जोड दिए । उनले प्रहरी टोलीकै प्राविधिक जाँचपश्चात् इनरुवा सारिएको अस्पतालका नाममा बखेडाबाजी गरिनु उचित नहुने बताए ।
आफूहरूका जायज माग सम्बोधनमा ढिलाइ गरिए रिले अनशनसहित सडक संघर्षका कार्यक्रम अघि बढाउने सर्वदलीय बैठकबाट निर्णय गरिएको छ ।
