काठमाडौं । प्रधान सेनापति प्रभुराम शर्माले जर्नेल अशोक सिग्देलको दुईवटा नागरिकता भएको स्वीकार गरेका छन् ।

संसद्को राज्यव्यवस्था तथा सुशासन समितिको बैठकमा सांसदहरूले उठाएका प्रश्नको जवाफ दिँदै प्रधान सेनापति शर्माले जाजरकोट र रुपन्देहीको नागरिकतामा विवरण फरक नपरेको बताए । 

“अशोक सिग्देलको दुई वटा नागरिकता छ । एउटा रूपन्देही र अर्को जाजरकोटबाट लिएको हो,” प्रधान सेनापति शर्माले भने, “तर सबै विवरण उस्तै छ । केही तलमाथि छैन ।” 

उनले सेनाको विरोध गर्ने र बदनाम गराउने उद्धेश्यले विवादित विषय बाहिर ल्याइएको बताए । 

“सेनाको विरोध गरेको छ, बदनाम गराउन खोजेको छ, एकोहोरो रटान मात्र छ,” शर्माले भने, “यो सेनालाई गलत देखाउने तत्वहरूको खेल हो । जसले यो कुरा ल्यायो कारबाही हुनुपर्छ ।” 

उनले बाहिर बसेर जे भन्दिए पनि छोड्दिन नहुने भन्दै गलत टिप्पणी गर्नेलाई कारबाही गर्ने कानुन चाहिएको बताए ।