काठमाडौं । राष्ट्रिय प्रजातन्त्र पार्टी (राप्रपा)ले राजसंस्थासहित हिन्दुराष्ट्र पुनःस्थापना र प्रदेश तह खारेजीको माग गर्दै ‘बृहत्’ आन्दोलन गर्ने भएको छ । गएको आइतबारदेखि मंगलबार (आज)सम्म बसेको केन्द्रीय कार्यसमितिको बैठकबाट अध्यक्ष राजेन्द्र लिङदेनको नेतृत्वमा केन्द्रीय आन्दोलन मूल समिति गठन गरिएको हो ।

सो समितिमा केन्द्रीय कार्यसमितिका सबै पदाधिकारी, केन्द्रीय सदस्यहरू र आमन्त्रित केन्द्रीय सदस्यहरू रहने पार्टीका प्रवक्ता मोहन श्रेष्ठले जानकारी दिए ।

पार्टीका संगठन विभाग प्रमुख एवं महामन्त्री धवलशमशेर राणाको संयोजकत्वमा आन्दोलन परिचालन समिति गठन गरिएको छ । पार्टीका कोषाध्यक्ष नीलकण्ठ काफ्लेको संयोजकत्वमा आर्थिक परिचालन समिति गठन गरिएको उनले बताए ।

प्रवक्ता श्रेष्ठको संयोजकत्वमा प्रचार तथा प्रसार समिति गठन गरिएको छ । बैठकबाट १३ बुँदे निर्णय गरिएको उनले जानकारी दिए ।