नांगा मान्छे र सुकेका दाउराहरू

साहित्य

कविता

शनिबार, मंसिर ३०, २०८०

जाडो छ
त्यसैले त केही मान्छेहरू
रहरले, करले या बलले
वस्त्र खोलेर सर्वांग भई
न्यानोका लागि भन्दै
वन डुल्दै छन्
सुकेका दाउरा खोज्न
आगो बाल्न, आगो ताप्न !

मौसम भन्नु यस्तै हो
यो जाडोको
वन त छ
तर
छ त पतझडको
मरेतुल्य छन् वृक्षहरू
अनि छन् भुईंभरि
रुखबाट खसेका
बल्न काबिल
सुकेका दाउराहरू !

केही मान्छेहरू
रहरले, करले या बलले
वस्त्र खोलेर सर्वांग भई
पहिलेजस्तै अहिले पनि
पछि पनि
हरेक जाडोमा
वन डुल्छन्
सुकेका दाउराको खोजीमा
आगो बाल्न, आगो ताप्न
न्यानोका लागि भन्दै ।

अनि,
पहिलेजस्तै अहिले पनि
पछि पनि
हरेक जाडोको
पतझडमा
मरेतुल्य वृक्षको फेदमा
वरपर
असरल्ल भेटिन्छन्
बल्न काबिल
सुकेका दाउराहरू !
(बर्लिन, जर्मनी)

प्रकाशित मिति: शनिबार, मंसिर ३०, २०८० ०७:४१