विराटनगर । प्रमुख प्रतिपक्ष दल नेकपा (एमाले)को मध्यपहाडी लोकमार्गकेन्द्रित झुलाघाट–चिवाभञ्ज्याङ संकल्पयात्रा मंगलबार कोसी प्रदेशको घुर्मीमा आइपुगेको छ । पार्टी अध्यक्ष केपी शर्मा ओली नेतृत्वको टोलीलाई उदयपुरको घुर्मीमा स्वागत गरिएको छ ।
ओलीसहित टोलीलाई स्वागत गर्न उदयपुर, ओखलढुंगा, सोलुखुम्बु र खोटाङबाट ठूलो संख्यामा नेता–कार्यकर्ता तथा सर्वसाधारण उपस्थित रहेको एमाले कोसीका अध्यक्ष घनश्याम खतिवडाले बताए ।
ओखलढुंगाको हर्कपुरमा सभा गरेर ओलीसहितका नेताहरू सोमबार नै खोटाङको हलेसी पुग्ने खतिवडाले जानकारी दिए ।
मध्यपहाडमा रित्तिँदै गएको बस्ती, कृषिको अवस्था, पूर्वाधारको अवस्थिति, राज्यका तर्फबाट मध्यपहाडमा शिक्षा, स्वास्थ्य र सडकका क्षेत्रमा गरिएको लगानी र त्यसको प्रभाव के छ भन्ने बुझ्न अभियान केन्द्रित हुने खतिवडाले बताए । उनले भने, “समस्या बुझ्न र गुमेको साख फर्काउने प्रयासस्वरूप अभियान सञ्चालन गरिएको हो ।”
एमाले नेताको विरोधस्वरूप पहिचानवादीका तर्फबाट मध्यपहाडी लोकमार्ग बन्द घोषणा गरिएको छ ।
